Црква „Св. Димитриј“ - Смоквица

Местоположба
Свети Димитриј

Камбанаријата на црквата
македонска православна црква
Епархија	Повардарска
Архијерејско намесништво	Гевгелиско
Парохија	Негорска

Координати	41°15′34.7″N 22°28′04.4″E / 41.259639°N 22.467889°E / 41.259639; 22.467889
Место	Смоквица
Општина	Гевгелија
Држава	Македонија
Општи податоци
Покровител	Свети Димитриј Солунски
Изградба	околу 1830
Архитектонски опис
Архит. тип	трикорабна

Свети Димитриј — главна селска црква во гевгелиското село Смоквица.

Црквата претставува културно наследство на Македонија.

Местоположба

Црквата се наоѓа во крајниот западен дел од селото.

Историја

Црквата е изградена во првата половина на XIX век, односно околу 1830 година, а била обновена во 1905 година од страна на градителската дружина на познатиот неимар, резбар и зограф Андон Китанов.^[1]

Била прогласена за културно наследство на Македонија со решение од 7 мај 2003 година од страна на Републичкиот завод за заштита на спомениците на културата.^[2]

Архитектура

Градбата на црквата е трикорабна, со дрвени тавани. Средишниот кораб е поизвишен од страничните и е покриен со квадратни полиња изведени со тенки летвички. Во средината на главниот кораб е насликана икона на платно на којашто е претставен ликот на Исус Христос Седржител. Покривната конструкција е изградена на две води и е потпрена на осум столба, распоредени во два реда со по четири на јужната и северната страна.^[1]

Во дворот на црквата се сместени селските гробишта, камбанаријата и помошен објект. Камбанаријата има квадратна основа и се состои од четири дела, при што основата на секој следен дел има помала основа. На секоја од страните на првите три дела има по една монофора, додека последниот дел е со повеќе отвори од страните. Камбанаријата е покриена со пирамидален лимен кров над кој има крст.

Фрескоживопис

Црквата била зографисана во 1846 година, што може да се забележи и од натписот над главната влезна врата на јужниот ѕид, од внатрешната страна.^[1]

Икони и иконостас

Иконостасот во внатрешноста на храмот е исполнет со вредни икони и царски двери изработени од страна на Андон Китанов. Дверите биле изработени во 1863 година во резба со мотиви од растителниот свет.^[1]