Судна гробница

Од Википедија — слободната енциклопедија
Судна гробница
Μακεδονικός τάφος της Κρίσεως
Фасада на гробницата
Карта
МестоГолишани, Негушко
ОбластЕгејска Македонија, Грција
Координати40°39′15″ N; 22°08′11″ E / 40.6541° СГШ; 22.1363° ИГД / 40.6541; 22.1363Координати: 40°39′15″ N; 22°08′11″ E / 40.6541° СГШ; 22.1363° ИГД / 40.6541; 22.1363
Видгробница
Историја
Раздобјемакедонско

Судна гробница (грчки: Μακεδονικός τάφος της Κρίσεως) — древномакедонска гробница од последната четвртина на IV век п.н.е. кај селото Голишани, Негушко, Егејска Македонија.[1][2] Важи за најголемата и највпечатливата македонска гробница досега пронајдена. Откриена е случајно во 1954 г. и откопана од Фотиос Пецас во периодот од 1954 до 1964 г. Реставрирана е во 1998 г.[1][2] В 1962 година[3] и повторно заедно со целата некропола во 2012 г. гробницата е прогласена за споменик на културата.[4]

Местоположба[уреди | уреди извор]

Хермес Душоводец
Радамант

Гробницата е дел од македонскииот град Миеза, чии остатоци се наоѓаат крај негушкото село Голишани. Сместена е е на 2 км источно од Голишани, на стариот пат кој ја поврзувал Миеза со Едеса. На 150 м на запад е Антемиската, а на 300 м на исток — Кинховата гробница.[2]

Име[уреди | уреди извор]

Името на гробницата доаѓа од сликата на фасадата, на која е претставен поковникот воден од Хермес Душоводец (Психопопм) пред Еак и Радамант — судиите во Подземниот свет.[2][2]

Архитектура[уреди | уреди извор]

Гробницата е ограбена и оштетена уште во антиката. Има две одаи и свиен покрив. Покриена е со глинена могила, висока 1,50 м и со пречник од 10 м.[2] Ова е единствената македонска гробница со двокатна фасада, која наизменично редува дорски стил долу и јонски горе.[1][2] Така фасадата имитира двокатна зграда со фронтон.[2] Четири дорски полустолбови и два пиластра во аглите држат архитрав и дорски фриз. Над корнизот и едно разнобојно подрачје со цветни украси е разработен јонски фриз, на чиј релјеф е претставена борба со варвари — веројатно Македонците со Персијците. Над фризот меѓу шесте јонски полустолбови и двата пиластра има седум псевдопрозорци кои истовремено се потпора. Од фронтонот останати се само фрагменти. Внатре гробницата е поделена на тесно, но високо претсобје и главна погребна одаја.[1]

Живопис[уреди | уреди извор]

Сликите на фасадата ја прават гробницата уникатна. Тие се поврзани со верувањата опишани во Платоновиот дијалог „Горгија“. Живописот се состои од четири самостојни слики нацртани во полињата меѓу дорските столбови. На двете паноа лево од влезот на гробницата се покојникот и Хермес Душоводец, кој го води во Подземното царство, а на двете десно се судиите Еак и Радамант. Покојникот, облечен во кратка туника, е единствениот кој не е означен со натпис, очигледно бидејќи бил доста познат граѓанин на Миеза. Се претпоставува дека се работи за Певкест, истакнат војсководец на Александар Македонски родум од Миеза. Метопите се украсени со исклучителни слики од легендарната битката меѓу лапитите и кентаурите.[1]

Поврзано[уреди | уреди извор]

Наводи[уреди | уреди извор]

  1. 1,0 1,1 1,2 1,3 1,4 „Ο μακεδονικός τάφος της Κρίσεως“. Δήμος Νάουσας. Архивирано од изворникот на 2016-06-02. Посетено на 29 мај 2016.
  2. 2,0 2,1 2,2 2,3 2,4 2,5 2,6 2,7 Ψαρρά, Ε. „Μακεδονικός τάφος της Κρίσεως“. Υπουργείο Πολιτισμού και Αθλητισμού. Архивирано од изворникот на 2023-04-01. Посетено на 29 мај 2016.
  3. „ΥΑ 15794/19-12-1961 - ΦΕΚ 35/Β/2-2-1962“. Διαρκής κατάλογος κηρυγμένων αρχαιολογικών τόπων και μνημείων. Архивирано од изворникот на 2020-07-20. Посетено на 1 јули 2018.
  4. „ΥΑ ΥΠΠΟΤ/ΓΔΑΠΚ/ΑΡΧ/Α1/Φ17/55576/2783/12-6-2012 - ΦΕΚ 204/ΑΑΠ/14-6-2012“. Διαρκής κατάλογος κηρυγμένων αρχαιολογικών τόπων και μνημείων. Архивирано од изворникот на 2021-12-08. Посетено на 9 јули 2018.

Надворешни врски[уреди | уреди извор]