Сретсело (Мршевци)

Сретсело — археолошко наоѓалиште во скопското село Мршевци. Претставува населба од младото камено време.

Опис

Старото селско јадро „Сретсело“ лежи на издолжена тераса, со површина од 3 хектари, која на западната страна е засечена со суводолица, на јужната е отворена кон полето, а на другите две страни е поткрената и поврзана со околните височинки. Куќите на овој дел на селото се подигнати на теренот од некогашната младо камена населба. Првите информации за нејзиното постоење потекнуваат од двајца мештани кои во текот на 1987 година, при копање на темели за новоградби, оддалечени околу 100 м една од друга, откриле интересен керамички материјал. Интервентното ископување покажало дека се работи за останоци од населба со два хоризонта на живеење. Во постариот хоризонт биле откриени две огништа направени од глина врз подлога од камен и керамички делови, делови од куќен лепеж, голем број делови од керамички садови, култни предмети и орудија од кремен и камен. Временски и културно овие наоди се идентични со наодите од Тумба од Маџари, што кажува дека населбата од овој хоризонт му припаѓа на средното младо камено време од културната група Анзабегово-Вршник (II-IV). Керамиката од помладиот хоризонт е разновидна и мошне квалитетна и кај неа се издвојуваат садови од двоконусн профилиран стомак, украсувани со канелури и врежување и со држалки во облик на рокче, кршало или петлица. Типолошки е слична со керамиката од Зелениково II, што значи дека овој слој од населбата е од времето на доцното младо камено време.

Поврзано

• Мршевци;
• Список на археолошки наоѓалишта во Скопско.