Филолошки факултет „Блаже Конески“ - Скопје

Филолошки факултет „Блаже Конески“ - Скопје

Фоајето на Филолошкиот факултет
Вид	државен
Основан	1974
Декан	д-р Максим Каранфиловски
Место	Скопје, Република Македонија
Мреж. место	www.flf.ukim.edu.mk Официјалното лого на филозофскиот факултет

Филолошкиот факултет „Блаже Конески“ при Универзитетот „Св. Кирил и Методиј“ во Скопје е највисока образовна и научна и јавна установа од областа на филолошките науки во Република Македонија.

Основање

Филолошкиот факултет бил основан со закон што го донела Владата на НР Македонија за организирање универзитет во Скопје во 1945 година и со посебно решение во 1946 година. Првиот декан бил Михаил Петрушевски, а првите предавања започнале на 16 декември 1946 како дел од тогашниот прв македонски факултет - филозофскиот факултет, кој е темелник на тогаш идниот македонски универзитет, денешниот „Св. Кирил и Методиј”. Денес факултетот постои веќе 63 години, а како самостојна институција од 1974. Во 1995 година Филолошкиот факултет бил преименуван во Филолошки факултет „Блаже Конески“.

Први професори

Првите петмина професори на Филолошкиот факултет на универзитетот во Скопје биле:

• Блаже Конески
• Михаил Петрушевски
• Харалампие Поленаковиќ
• Ѓорѓи Шоптрајанов
• Љубен Лапе.

Катедри

Додипломските студии на факултетот траат четири години, а од 2005 година наставата се изведува според критериумите на европскиот кредит трансфер систем и Болоњската декларација. Наставно-научната работа на факултет е организирана и се изведува преку десет катедри. Се организираат последипломски студии од научните области јазик и книжевност, и тоа:

• Катедра за македонски јазик и јужнословенски јазици
• Катедра за македонска книжевност и јужнословенски книжевности
• Катедра за албански јазик и книжевност.
• Катедра за турски јазик и книжевност
• Катедра за славистика
• Катедра за романски јазици и книжевности
• Катедра за германски јазик и книжевност
• Катедра за англиски јазик и книжевност
• Катедра за општа и компаративна книжевност
• Kатедра за преведување и толкување

Постојат исто така уште два оддела:

• Оддел за настава по странски јазик на нематичните факултети
• Центар за тестирање и сертифицирање на македонскиот јазик

Други изучувани јазици

Покрај јазиците на катедрите, на факултетот се изучуваат и следниве јазици:

• шпански
• португалски
• кинески
• корејски
• унгарски
• чешки
• полски
• хрватски
• словенечки
• романски

Библиотека

Филолошкиот факултет располага со девет библиотеки при соодветните катедри. Библиотеките располагаат со богат фонд на книги и списанија што го користат голем број студенти, наставници и научни работници од факултетот и надвор од него. Фондот на книги и списанија се обновува постојано со средства на факултетот, но и со донации на странски амбасади, културни центри и други институции на земји чии јазици се изучуваат на филолошкиот факултет.

Издавачка дејност

Факултетот има и издавачка дејност. Покрај издавањето учебници за потребите на наставата, разни информативни и прирачни книги за студентите, се издаваат и низа монографски трудови од разни области на филолошките науки, речници и други лексикографски трудови.

Надворешни врски

• Официјалното веб-место на филолошкиот факултет „Блаже Конески“