Сојуз на комунистите на Македонија

Сојузот на комунистите на Македонија (СКМ) беше македонска секција на Сојузот на комунистите на Југославија, владејачката партија во СФР Југославија во текот на нејзиното постоење. До април 1952 го носи називот Комунистичка партија на Македонија (КПМ).

КПМ е основана на 19 март 1943 година во Тетово. Нејзиниот прв Централен комитет беше во состав: Лазар Колишевски (политички секретар), Мара Нацева (организациски секретар), Цветко Узуновски, Кузман Јосифовски - Питу, Страхил Гигов и Бане Андреев. Првиот конгрес на КПМ се одржа во 1948 година.

Со воведувањето на партискиот плурализам, СКМ го промени своето име во СКМ - Партија за демократска преобразба (СКМ-ПДП) и под тој назив учествуваше на првите повеќепартиски избори во Република Македонија во 1990. Истовремено, ја промени својата комунистичка идеологија со социјалдемократска. На својот конгрес од април 1991 СКМ - ПДП го промени своето име во Социјалдемократски сојуз на Македонија, СДСМ. Мал дел од членството на СКМ- ПДП се отцепи од матичната партија и ја задржа комунистичката идеологија, или барем комунистичкото име.

Секретари на СКМ (КПМ)

1. Лазар Колишевски (март 1943 - јули 1963)
2. Крсте Црвенковски (јули 1963 - март 1969)
3. Ангел Чемерски (март 1969 - мај 1982)
4. Крсте Марковски (мај 1982 - 5 мај 1984)
5. Милан Панчевски (5 мај 1984 - јуни 1986)
6. Јаков Лазароски (јуни 1986 - 1989)
7. Петар Гошев (1989 - април 1991)