Михајло Маневски

Михајло Маневски (Башино Село, велешко, 26 декември 1937) е македонски политичар и министер за правда во седмата влада на Македонија.

Биографија

Маневски е роден во велешко Башино Село на 26 декември 1937 година. Дипломирал на Правниот факултет во Скопје 1960 година. Во Јавното обвинителство на Република Македонија работи повеќе од 28 години.

Бил заменик околиски јавен обвинител во Штип, јавен обвинител во Основното јавно обвинителство во Велес, а од 1966 до 1976 година бил заменик на Окружниот јавен обвинител во Скопје. Од 1976 до 1984 година е заменик на јавниот обвинител на Република Македонија. Од 1984 до 1986 година бил претседател на Окружниот суд во Скопје. Во 1986 година е избран за член на Извршниот совет на Република Македонија и министер за правосудство и управа. Функцијата ја извршува до 1991 година. Од 1994 до 2000 година е советник во Владата, а во 2000 година е именуван за заменик на јавниот обвинител на Македонија.

Во 2002 година е избран за член на Државната комисија за спречување на корупцијата, а во декември 2005 година е избран и за нејзин претседател. Маневски работел на подготвување на голем број законски и подзаконски акти од областа на правосудството, казненото право, финансискиот криминал и корупцијата и во работни тела за изготвување на амандмани на уставни одредби. Учествувал на повеќе меѓународни конференции за прашањата на организираниот криминал, особено финансискиот криминал и корупцијата. Во 2003 година ја издаде книгата Казнено правна заштита на јавните финансии - правни аспекти и практични искуства, а во 2005 година ја издаде втората книга Корупцијата во Република Македонија - Превентивни и казнени мерки за спречување. Објавил и повеќе научни трудови, во стручни списанија и билтени од областа на казненото право и финансискиот криминал и корупцијата.