Лазар Личеноски

Авопортрет од 1947 г.

Лазар Личеноски (Галичник, 26 март 1901 - Скопје, 10 април 1964) — македонски експресионистички сликар и еден од најавтентичните сликари на македонскиот пејзаж, во кои внесувал и фолклорни елементи. Сликал и мртва природа, портрети и мозаици.

Образование

Уметничка школа со академски курс завршил во Белград, 1927 год. Специјализирал ѕидни техники во Париз во ателјето на Марсел Линоар и кај Пол Бодуен на Високата школа за уметности и занаети (École nationale supérieure d'arts et métiers), ги посетувал ателјето на Андре Лот и академијата „Гран Шомје“ (Académie de la Grande Chaumière) од 1927 до 1929 г.

Кариера

Живеел во Белград, а потоа во Скопје. Бил член на предвоената белградска група „Облик“.

Самостојно изложувал пред и по војната (за прв пат во 1927) во Скопје, Белград, Загреб, а учествувал (од 1927) на групни изложби во Скопје, Париз, Белград, Лондон, Ливерпул, Манчестер, Солун, Прага, Софија, Рим, Букурешт, Братфорд, Канада, Тунис и други места.

Бил професор и директор на училиштето за применета уметност во Скопје, дописен член на САНУ итн. Добитник е на Октомвриската награда за сликарство во 1959 година.

Позначајни дела

Меѓу позначајните дела на Личеноски се вбројуваат: „Бачила“, „Долап“, „Афионски полиња“, „Охридски рибари“ и многу други.

Поврзано

• ДСУ „Лазар Личеноски“ - Скопје

Надворешни врски

• Сликарот Лазар Личеноски: По повод ретроспективната изложба на Л. Личеноски во Музеј на современата уметност, Скопје, октомври 1998. Галерија Осврти „Блесок“ бр. 14, април-мај, 2000
• Лазар Личеноски: Доајен на македонското современо сликарство