Рамнодушен (расказ)

Од Википедија — слободната енциклопедија
Прејди на прегледникот Прејди на пребарувањето

Рамнодушен е расказ на францускиот писател Марсел Еме. Расказот е објавен на македонски јазик во 2008 година (во состав на збирката раскази под наслов “Париски приказни”), од страна на издавачката куќа “Темплум”, а преводот од француски јазик е направен од Ружа Димишковска.

Содржина[уреди | уреди извор]

Штотуку излезен од затвор, главниот јунак на расказот оди кај криминалецот Меде, барајќи некоја работа. Меде му вели дека повеќе не се бави со такви работи и го упатува кај друг криминалец, со име Гистав. Гистав има вооружена група која ги ограбува околните фармери, често извршувајќи брутални убиства. Главниот лик се истакнува со своето ладнокрвно и професионално извршување на убиствата и поради тоа, тој е унапреден, така што добива друга работа. Неговата задача е да носи клиентите до една ливада од каде што божем тие треба со авион да пребегаат во Англија, но наместо тоа, тој треба да ги убие и да им ги земе вредните работи. Сепак, нему не му се допаѓа идејата да убива на таков подмолен начин и затоа му ја кажува вистината на клиентот и не го извршува убиството. Потоа оди кај Големата Бети, која му била љубовница на татко му, а со која и тој самиот имал неколку сексуални односи. Таа му кажува дека Меде и организирал тајно пребегување во Англија, со авион. Така, тој дознава дека, всушност, Меде е неговиот шеф. Утредента, тој ги изненадува Меде и Големата Бети и ги заклучува во подрумот на напуштената куќа во која тој треба да ја убие Бети. Притоа, тој им фрла еден револвер и Меде и Бети се борат за да го земат револверот. Главниот лик на расказот седи на ливадата и слуша истрел, а потоа од подрумот излегува Бети.[1]

Наводи[уреди | уреди извор]

  1. Марсел Еме, Париски приказни, Темплум, Скопје, 2008.