Прекуокеански брод

Прекуокеански брод — брод, обично патнички, кој патува за испорака на трговски товар или патници од појдовното пристаниште до назначеното пристаниште според однапред објавен распоред. Прекуокеанскиот брод се разликува од бродот за крстарење по обликот и силата на трупот, подобрата пловност, зголемената моќност на моторот и поголемата брзина. Прекуокеанските бродови мораат да имаат попространи прегради за превоз на багаж, како и посебни прегради за превоз на домашни миленичиња.^[1]

За разлика од траектите, кои покриваат релативно кратки растојанија, прекуокеанските бродови на трговската и патничката флота пловат на значително подолги морски растојанија, често дури и меѓу континентите. Пред појавата на меѓуконтиненталната воздушна комуникација, прекуокеанските бродови им го обезбедувале на поединците најбрзиот и најбезбедниот начин да ги преминат океаните и биле неопходни за океански превоз.

Преглед

Прекуокеанските бродови биле главното средство за меѓуконтинентално патување повеќе од еден век, од средината на XIX век до преземањето на патнички авиони во текот на 1960-тите. Покрај патниците, прекуокеанските бродови превезувале и пошта и товар. Бродовите под договор со Британската кралска пошта го носеле префиксот RMS (Royal Mail Ship — кралски поштенски брод). Прекуокеанските бродови се користеле и за превоз на злато и други високовредни товари.^[2]

Најпрометната маршрута за прекуокеанските бродови била северноатлантската, со линии меѓу Европа и Северна Америка, каде што пловеле најбрзите, најголемите и најсовремените бродови. Иако изразот „прекуокеански брод“ најчесто се однесува на еден од познатите „суперлајнери“, повеќето такви бродови биле со средна големина, за заеднички превоз на патници и товар меѓу земјите и меѓу колониите и матичната земја во епохата пред патничките авиони. Таквите маршрути вклучувале линии од Европа до африканските и азиските колонии, од Европа до Јужна Америка и емигрантскиот сообраќај од Европа до Северна Америка од крајот на XIX век до 1920-тите, и до Канада и Австралија по Втората светска војна.

Наводи

↑ „Maritime historian Chris Frame: how the ocean liner changed the world“. ABC National. 1 July 2015. Посетено на 1 September 2022.
↑ Pickford, Nigel Lost Treasure Ships of the Twentieth Century, National Geographic Society, 1999 ISBN 0-7922-7472-5

Надворешни врски

Gare Maritime A Journey into the Golden Age of Travel

[1] „Maritime historian Chris Frame: how the ocean liner changed the world“. ABC National. 1 July 2015. Посетено на 1 September 2022.

[2] Pickford, Nigel Lost Treasure Ships of the Twentieth Century, National Geographic Society, 1999 ISBN 0-7922-7472-5

[1]

[2]