Плоштад „Гоце Делчев“ (Струмица)

Од Википедија — слободната енциклопедија
(Пренасочено од Плоштад „Гоце Делчев“)
Прејди на прегледникот Прејди на пребарувањето
Плоштад „Гоце Делчев“
Плоштад Гоце Делчев Струмица (2).jpg
Панорама на горниот дел со поглед кон платото и споменикот „Гоце Делчев“ (десно)
Плоштад „Гоце Делчев“ (Струмица) is located in Струмица
Плоштад „Гоце Делчев“ (Струмица)
Местоположба во рамките на Струмица
Општи податоци
ГрадСтрумица
ЗемјаМакедонија Македонија
Координати41°26′19.5″N 22°38′13.8″E / 41.438750° СГШ; 22.637167° ИГД / 41.438750; 22.637167Координати: 41°26′19.5″N 22°38′13.8″E / 41.438750° СГШ; 22.637167° ИГД / 41.438750; 22.637167
Надм. височина256 м
Пуштена во употреба10 декември 2010
Трошок за обнова~ 3.5 милиони евра
СопственикОпштина Струмица
Технички податоци
Катови2
Подна површина23.485 м²

Плоштадот „Гоце Делчев“ e главниот плоштад во градот Струмица, југоисточна Македонија и најголемиот во државата со вкупна површина од 23.485 квадратни метри. Плоштадот бил реконструиран во 2010 година и тогаш добива речиси целосен нов изглед. Главната знаменитост е споменикот „Гоце Делчев“, поставен во 1970-тите години, по кој и го добива името. Освен главниот отворен простор, плоштадот има и подземен дел со сообраќајница и паркинг за возила. Денес се користи за различни манифестации и настани, меѓу кои секоја година на него се одржуваат и Струмичкиот карневал и Струмица Опен Фестивал.

Историја[уреди | уреди извор]

Споменикот „Гоце Делчев“ пред реконструкцијата

Во минатото дел од просторот на денешниот плоштад се користел како градски пазар, а подоцна овде била сместена и автобуската станица. Со проширувањето на Струмица во 1970-тите години, неколку куќи и објекти со неокласичен стил биле разрушени и според новиот урбанистички план плоштината на плоштадот била зголемена.

По повод 100-годишнината од раѓањето на Гоце Делчев на плоштадот бил поставен негов споменик. Реализацијата започнала во 1973 година. Составен е од статуа на Делчев на подлога со негов цитат: „Јас го разбирам светот како поле за културен натпревар меѓу народите“ и две платна со 16 фигури на комити. Споменикот бил завршен во 1976 година.[1]

Реконструкција[уреди | уреди извор]

Во 2010 година плоштадот бил реконструиран. Зафатот речиси целосно го променил изгледот на плоштадот. Тој бил поделен на две нивоа од кои првото е подземна сообраќајница со паркинг простор која го решила сообраќајниот метеж, додека второто ниво е надземен дел со широк отворен простор за пешаци.

Надземниот дел од плоштадот бил поплочен со гранит и добил неколку знаменитости. Споменикот „Гоце Делчев“ бил задржан, но биле направени промени така што подлогата добила нов изглед и двете платна со фигури на комити биле додадени на левата и десната страна од подлогата. Зад споменикот било изградено плато на кои се поставени две фонтани. Плоштадот исто така добил Саат-кула со три часовници и бронзена фигура „Струмичанка под маска“ како симбол за Струмичкиот карневал.

На центарот од отворениот простор на плоштадот била поставена и бакарна ѕвезда во чест на македонскиот фудбалер Горан Пандев, роден во Струмица, кој истата 2010 година ги освоил титулите од Лигата на шампионите и Светското клупско првенство во дресот на ФК Интер.[2] Ѕвездата била откорната и украдена во ноември 2018 година од непознати сторители.[3]

За реконстукцијата биле потрошени околу 3.5 милиони евра, обезбедени од Општина Струмица. За лиењето со бронза на споменикот „Струмичанка под маска“ средствата ги дала Меѓународната ликовна колонија. Саат кулата е донација од компанијата Адора инженеринг. Плоштадот официјално бил отворен на 10 декември 2010 година, ден пред патрониот празник на Струмица.[4]

Знаменитости[уреди | уреди извор]

Транспорт[уреди | уреди извор]

Сообраќајната раскрсница во подземното ниво на плоштадот

Подземниот дел на плоштадот е составен од сообраќајница во „Т“ форма и паркинг простор. Во сообраќајницата минуваат улицата „Моша Пијаде“ и регионалниот пат R2432, кој започнува од раскрсницата меѓу главниот булевар „Маршал Тито“ и „Ленинова“ и води до Вељуса. Подземниот паркинг има капацитет за 80-тина возила и е опремен со заштитни рампи, пешачки влезови, сообраќајна сигнализација и јавен градски тоалет. Овој дел од плоштадот е дел од реконструкцијата во 2010 година.[5]

Наводи[уреди | уреди извор]

  1. „Споменик „Гоце Делчев““. Општина Струмица. конс. 26 декември 2018. 
  2. „Од обичен до европски изглед - плоштад „Гоце Делчев““. www.strumicacity.com. 25 октомври 2012. конс. 2 јануари 2019. 
  3. „Откорната и украдена ѕвездата на Горан пандев од струмичкиот плоштад“. www.strumicacity.com. 1 ноември 2018. конс. 2 јануари 2019. 
  4. „„Жикол“ ќе го гради новиот градски плоштад во Струмица“. Идивиди. 24 март 2010. конс. 27 декември 2018. 
  5. „Пуштен во употреба новиот градски плоштад „Гоце Делчев““. Општина Струмица. 14 декември 2010. конс. 30 декември 2018. 

Надворешни врски[уреди | уреди извор]