Павле Арсоски

Од Википедија — слободната енциклопедија
Прејди на прегледникот Прејди на пребарувањето

Генерал-мајор Павле Арсоски е командант на Командата за операции во Армијата на Република Северна Македонија.

Павле Арсоски
Генерал-мајор Павле Арсоски 2.jpg
Арсоски во 2020 година
РоденГостивар, Република Македонија
РодАртилерија
Служба1990 до денес
Чингенерал-мајор
ЕдиницаКоманда за операции
Заповедал соКоманда за операции,

Здружена оперативна команда, 1.механизирана пешадиска бригада,

Полк за специјални операции,

1.пешадиски баталјон
ОдликувањаВонредно унапредување во чин мајор;

Златна, Сребрена и Бронзена значка на АРМ;

Плакета на АРМ; Сребрена значка на АРМ за долгогодишна служба;

Златна и сребрена значка на АРМ за партнерство, координација и соработка.

Биографија[уреди | уреди извор]

Роден е во Гостивар во 1967 година, воена гимназија завршува во Загреб (Република Хрватска) во 1986 година, а военото образование го продолжува на Воената академија на копнената војска во Белград (Република Србија) и Задар (Република Хрватска). Дипломирал во 1990 година како потпоручник на родот артилерија. Воената кариера ја започнува во поранешната Југословенска Народна Армија (ЈНА) во Република Словенија, а во Армијата на Република Македонија[1] е од првиот ден на нејзиното формирање во април 1992 година. Во текот на својата богата војничка кариера, генералот Арсоски извршува бројни командни и штабни должности. Негова прва должност во Армијата на Република Македонија (АРМ) е командир на вод во артилерискиот дивизион на 1.гардиската бригада во Скопје, а потоа следователно, командир на чета, заменик командант на баталјон и командант на 1.пешадиски баталјон на 15.пешадиска бригада во Тетово. За време на воениот конфликт во 2001 година[2], Арсоски командува со пешадиски баталјон и подоцна со баталјонска борбена група во Тетовско и на Шар Планина, за што истата година вонредно е унапреден во чин мајор. Во 2003 година станува дел од најелитната борбена единица на АРМ, полкот за специјални операции. Најпрво ја извршува должноста началник за операции, планирање и обука, а во 2010 година е поставен за началник на штаб и унапреден во чин полковник. Командант на полкот за специјални операции стана во 2012 година. Со Указ на Претседателот на Република Македонија и Врховен командант на вооружените сили, во август 2013 година е поставен за командант на 1. механизирана пешадиска бригада[3] и унапреден во чин бригаден генерал. Во 2015 година е поставен за заменик на командантот на Здружената оперативна команда, а три години подоцна во 2018 година, стана командант на Здружена оперативна команда[4][5][6]. Истата година е унапреден во чин генерал-мајор. Со трансформација на Армијата во 2019 година е поставен за командант на Командата за операции[7].

За време на воената кариера, Арсоски го продолжува своето военото образование. По дипломирањето на Постдипломски студии за командни и штабни должности во Скопје во 2003 година, во 2011 година го завршува највисоко воено образование и дипломира на Ратната школа „Бан Јосип Јелачиќ“ во Загреб, (Република Хрватска). Генерал-мајор Арсоски има завршено повеќе курсеви и обуки во земјата и странство, меѓу кои и престижните: Курс за командант на баталјон во Сојузна Република Германија, Курс за водачи на 21 век во Џорџ Маршал Центарот во Сојузна Република Германија, Курс за воен менаџмент и донесување на одлуки, Обука за воени аташеи и експерти за меѓународна комуникација и Курс за генерали и амбасадори во Одбранбениот колеџ на НАТО во Рим, (Република Италија).

Награди и признанија[уреди | уреди извор]

Вонредно унапредување во чин мајор во 2001 година, Златна, Сребрена и Бронзена значка на АРМ; Плакета на АРМ, Сребрена значка на АРМ за долгогодишна служба, Златна и сребрена значка на АРМ за партнерство, координација и соработка.

Семеен статус и интереси[уреди | уреди извор]

Генерал Арсоски од 1990 година е во брак со Елизабета Арсоска, дипломиран новинар и заменик главен и одговорен уредник на дневниот весник „Вечер“ со која има две деца, ќерка Марија, професор по германски јазик и син Александар, дипломиран економист. Зборува активно англиски и германски јазик.

Во слободно време генерал Арсоски активно се занимава со спорт, голем љубител е на ликовната и драмска уметност, како и опера и балет. Ја проучува воената историја, класичната литература, хералдиката и хорологијата.

Потпретседател е на здружението Клуб на генерали и секретар на Македонското грбословно друштво со титула Хералд Еригонски. Напоредно со военото образование, генерал-мајор Арсоски вложува и во надградба на цивилното образование. Во 2016 година ги завршува магистерски студии на Институтот за национална историја при Универзитот “Свети Кирил и Методиј” во Скопје и се стекнува со титула магистер по воена историја. Во моментов ги привршува докторските студии на истиот Институт.

Корисни линкови[уреди | уреди извор]

  1. „Армија на Македонија“. Википедија. 2020-05-31.
  2. „Воен конфликт во Македонија, 2001“. Википедија. 2020-05-31.
  3. „Генерал Арсоски, нов командант на механизираната пешадиска бригада“. А1он (англиски). 2013-09-06. Посетено на 2020-06-02.
  4. „Бригадниот генерал Арсоски нов командант на ЗОК“. Нова Македонија. Посетено на 2020-06-02.
  5. „Бригадниот генерал Арсоски нов командант на Здружената оперативна команда“. makpress.mk. Посетено на 2020-06-02.
  6. „Павле Арсоски - нов командант на Здружената оперативна команда“. МКД.мк. Посетено на 2020-06-02.
  7. „Команда за операции“. Посетено на 2020-06-02.