Орлови Чуки (Стар Караорман)

Орлови Чуки — археолошко наоѓалиште во штипското село Стар Караорман. Претставува тумули од железно време,. Северно, веднаш до селото, постепено се издига гребен кој претставува дел од последните падини на Плачковица. Со својата положба и височина доминира над околниот терен и има отворен поглед на запад, кон наоѓалиштето Горно поле –Балабаница, на југ кон коритото на Брегалница, а на исток кон полето на селото Таринци. До 1960 година и подоцна, по самиот раб на гребенот можеле да се видат 10 тумули, наредени во низа исток-запад, на растојание од 20 -40 м еден од друг, со пречник во основата од 9 до 18 м и височина меѓу 0,60 и 1,70 м. Денес тумулите речиси не постојат бидејќи 6 се целосно истражени, а другите се оштетени со земјоделските работи. Ископувањата покажале дека тумулите имаат родовски карактер и во нив биле погребани повеќе покојници, во гробови направени од камени плочи или од кршен камен, радијално распоредени околу централниот гроб. Сите се со гробни прилози од керамички садови, оружје од железо и накит од бронза и килибар. Наодите се чуваат во Завод и музеј (Штип), а еден дел во Музеј на Македонија.

• Иван Микулчиќ ., 1961, 47;
• Пашиќ Винчиќ Р., 1970, 129;
• Пашиќ Р., 1989, 78, 79. (В.С.)

Поврзано

• Варница - Крушка — осамен ранословенски наод;
• Горно Поле - Балабаница — населба и некропола од железното и раноантичкото време;
• Крушка — старохристијанска населба и базилика;
• Орлови Чуки — тумули од железното време;
• Трансформатор — осамен наод од неолитското време;
• Стар Караорман;
• Список на археолошки наоѓалишта во Штипско;
• Список на средновековни некрополи во Македонија.