Млад и здрав како роза

„Млад и здрав како роза“ (српски: Млад и здрав као ружа) — српски филм од 1971 година, во режија на Јован Јовановиќ. Главните улоги ги играат: Драган Николиќ, Александар Гавриќ, Данило Бата Стојковиќ, Марија Бакса итн. Филмот е дел од југословенскиот „црн бран“ и зборува за почетоците на врската меѓу југословенската државна безбедност и злосторниците. Речиси целиот филм е снимен со камера в раце, што ја засилува неговата драматика и му дава документаристички тон. Филмот бил прикажан само двапати: на Фестивалот во Пула и во Студентскиот културен центар во Белград, а потоа исчезнал, иако никогаш официјално не бил забранет. Првата следна јавна проекција била одржана дури 35 години по снимањето, во 2006 година, во рамките на ФЕСТ.

Синопсис

Стеван, наречен Стив (го игра Николиќ), е млад злосторник кој краде автомобили, ограбува бензински пумпи, ги искористува девојките, а извршува и неколку убиства. Еден ден, тој се среќава со полициски инспектор кој му нуди соработка. Наскоро, Стив станува еден од шефовите на подземјето во Белград, како и ѕвезда во медиумите. Тој се однесува гордо, има многу пари, живее во хотел и пука низ градот...