Куќа на Крапчевци
Куќата на семејството Каневчеви (Крапчевци) во Охрид е изградена во втората половина на XIX век, а се наоѓа веднаш до црквата Св. Софија. Овде мајсторите-градители постигнале вистинска хармонија во градбата со неправилна основа што има приземје и два ката од кои секој нареден е поширок од претходниот. Нивната виртуозност особено доаѓа до израз на западната, челна фасада на куќата, при обработката на тимпанот како силна завршница на објектот каде што се чувствуваат извесни барокни влијанија.
