Институт за етнологија и антропологија

Од Википедија — слободната енциклопедија
Прејди на: содржини, барај

Институтот за етнологија и антропологија при Природно-математичкиот факултет во Скопје е наследник на одделението за етнологија основано 1946 година од страна на професорот Бранислав Русиќ во рамките на тогашниот Филозофски факултет во Скопје. Одделението функционирало сè до 1953 година кога по одлука на Министерството за образование на НР Македонија престанало да постои. Единствено останал само предметот етнологија кој бил вклучен во наставниот план и програма на одделението за географија. Во периодот од 1969 до 1980 година имало повеќе иницијативи за обновување на одделението за етнологија, но сите биле безуспешни.

Во 1984 година одговорните државни тела од доменот на науката и образованието донеле одлука за обновување на одделението за етнологија како завод за етнологија во рамките на институтот за географија при Природно-математичкиот факултет во Скопје. Во тој период, до 1990 година на Заводот за етнологија работеле четворица доктори на етнолошки науки, во пензија: Галаба Паликрушева, Милош Константинов, Душан Константинов и Миодраг Хаџи-Ристиќ, а часовите по вежби ги држела асистент Мирјана Мирчевска. По 1990 година на заводот за етнологија дошле уште тројца доктори на етнолошки науки: Анета Светиева, Нијази Лиманоски и Ѓорѓи Здравев, еден доктор по музеолошки науки: Крсте Богоески, како и двајца асистенти кои подоцна ги одбраниле и своите докторски дистертации: Љупчо Неделков и Љупчо С. Ристески. Во последните неколку години на заводот за етнологија се вработиле уште двајца асистенти: Даворин Трпески и Илина Јакимовска.

Во 2005 година, на 31 март, наставно-научниот совет при ПМФ го променил статутот на ПМФ со што заводот за етнологија прераснал во институт за етнологија и антропологија и е внесен како седми институт во рамките на Природно-математичкиот факултет во Скопје, а официјално започнал да функционира од 1 октомври 2005 година. Сегашниот наставен план и програма на студиите на институтот се направени според наставните планови и програми на европскиот кредит-трансфер систем за етнологија и антропологија.

Надворешни врски[уреди | уреди извор]