Инди-игра

Екрански снимки од неколку инди-игри. По редослед на читање (од врвот до дното во мобилен приказ): Flotilla, Broforce, Celeste, Kentucky Route Zero, Tacoma, и Alto's Adventure.

Инди-игра (англиски: indie game, од англ. independent video game — „независна компјутерска игра“) — компјутерска игра создадена од поединечен развивач или мал колектив без финансиска поддршка од издавач на компјутерски игри.

Размерот на појавите поврзани со инди-игрите забележливо се зголемува од втората половина на 2000-тите години, главно поради развојот на новите начини на цифрена распределба и средствата за развој.

Како предводници на инди-индустријата, кои се натпреваруваат со игрите од ААА-ниво, се сметаат инди-игрите како: Braid, World of Goo, Super Meat Boy и Minecraft. Притоа, Minecraft е создадена од еден развивач, продадена е во десетици милиони примероци и е најпродаваната инди-игра според книгата на Гинисови рекорди.

Општ опис

Општоприфатена определба за поимот „инди-игра“ не постои, но инди-игрите најчесто имаат некои слични особености. Како по правило, инди-игрите се создаваат од поединечни развивачи, мали тимови или мали независни компании. Исто така, инди-игрите обично не се толку обемни како масовните игри со целосно финансирање.

Развивачите на инди-игри, по правило, немаат финансиска поддршка од издавач (бидејќи издавачите претпочитаат игри со висок буџет и најмал ризик), и обично имаат мал буџет или воопшто го немаат. Поради својата независност, инди-развивачите немаат оперативни ограничувања од страна на издавачите или творечки ограничувања и не им треба одобрување од издавачот, што е задолжително за развивачите на масовни игри. Како последица на тоа, одлуките на играчкиот дизајнер исто така не се ограничени со буџетот на проектот. Згора на тоа, колку е помал тимот, толку појасно се изразува индивидуалноста на конкретниот развивач.

Малите тимови, широките можности и отсуството на граници за креативноста создале услови во кои инди-игрите можат да бидат иновативни, творечки, со голема уметничка изразеност. Ограничени во можностите за создавање технолошка графика, развивачите се принудени да ставаат нагласок на иновативниот играчки процес. Меѓутоа, меѓу инди-игрите постојат и иновативни игри, и игри од класични жанрови. Така, припадноста на „инди“ не подразбира дека играта мора да носи иновации.

Развој

Во потрага по извор на финансирање за нова игра, инди-развивачите можат да прибегнат кон краудфандинг (збирно финансирање), барање издавач или создавање поддржувачка заедница за развој на играта. Ако проектот нема издавач, развивачите ги користат услугите за цифрена распределба што се нудат на семрежјето.

Развивачите на инди-игри не треба да се мешаат со развивачите љубители, за кои оваа активност е хоби, бидејќи инди-развивачите се посилно насочени кон издавање на производот отколку љубителите. Повеќето љубители создаваат модификации на постојните компјутерски игри, или работат со одредени технологии или делови од играта. Ваквите љубители обично создаваат некомерцијални производи и самите можат да бидат и почетници и ветерани во индустријата.

Заедница

Постојат разни заедници и настани посветени на инди-игрите. Тука спаѓаат изложби и конференции, како што се Independent Games Festival или IndieCade.

Indie Game Jam (IGJ) е годишен настан во светот на инди-игрите, кој ги охрабрува развивачите на експериментирање без ограничувања од издавачите. Основан е од Крис Хекер и Шон Барет, а првпат е одржан во 2002 г. Секоја година IGJ поставува нови задачи за иновации во областите на амбиентот, жанровите и управувањето. IGJ послужил како пример за создавање слични настани како Nordic Game Jam и Global Game Jam; вториот првпат бил одржан во 2009 г., собирајќи 1650 учесници од 53 земји.

Надворешни врски

• The Creativity of Indie Video Games