Ивица Милевски

Од Википедија — слободната енциклопедија
Прејди на прегледникот Прејди на пребарувањето

Ивица Милевски (р. 12 февруари 1972 во Куманово) — универзитетски професор на Институтот за географија при Природно-математичкиот факултет на Скопскиот универзитет.[1]

Биографија[уреди | уреди извор]

Образование[уреди | уреди извор]

Основно и средно училиште завршил во Куманово. Во 1995 година дипломирал на Институтот за географија при Природно-математичкиот факултет (ПМФ). Следната година, на истиот институт се запишал на постдипломските студии - насока просторно планирање, на што и магистрирал во 2001 година. Докторирал на ПМФ во 2006 година на тема „Геоморфологија на Осоговскиот планински масив“, со што се стекнал со титула доктор на географски науки.

Кариера[уреди | уреди извор]

Во 1996 година е примен како стручен соработник на Институтот за географија при ПМФ. Во 1999 година е избран во звањето помлад асистент, а во 2002 година, по магистрирањето, е избран во звањето асистент. Во овој период изведува вежби од повеќе предмети, главно од доменот на физичката географија. Во 2006 година бил избран за доцент, а во 2011 година за вонреден професор на Институтот за географија при ПМФ.

Од изборот за доцент, изведува предавања од предметите: математичка географија, земјата и вселената, педогеографија, ерозија на почвата, далечинска детекција, геоинформатика и туристички информациски системи. Исто така, предава на вториот и третиот циклус студии на Институтот за географија. До сега, бил ментор на неколку магистерски работи и член на комисии на 4 докторски дисертации. Има издадено еден универзитетски учебник, 3 предметни скрипти, еден учебник по географија за основно образование за дијаспората (во коавторство) и една научно-популарна книга „Вселена“ (во коавторство).

Научна дејност[уреди | уреди извор]

Неговата научна дејност е главно од областа на физичка географија и ГИС. Во таа смисла, до сега има објавено 95 научни трудови, од кои 32 во меѓународни списанија и 2 во списанија со импакт фактор. Исто така има објавено 5 поглавја во реномирани меѓународни монографии.

Автор е на околу 20 публикувани карти и ГИС продукти, како и на Географски атлас на Светот во издание на Просветно Дело од Скопје. Исто така бил клучен национален ГИС експерт за изработка на Педолошка карта на Република Македонија во размер 1:200 000 и 1:50 000. До сега учествувал во 25 домашни и меѓународни, научни и апликативни проекти и стратегии, од кои во 8 како раководител на експертски тим и уште во 6 како клучен експерт за дадена специјалност. Учествувал на 38 научни конференции, од кои 18 меѓународни и 2 светски конференции (IAG Geomorphology, Paris-2013; Geomorphometry, Poznan-2015). Бил член на научниот и организацискиот одбор на повеќе домашни и меѓународни конференции.

Издаваштво[уреди | уреди извор]

Ивица Милевски е главен уредник на стручно-научното географско списание Географски Разгледи. Во 2011 година го покренува првиот географски портал во Република Македонија ИГЕО (со околу половина милион прегледи), во кој до сега има објавено околу 220 авторизирани статии (од вкупно 760). Бил рецензент на повеќе меѓународни списанија.

Наводи[уреди | уреди извор]