Животот е прекрасен (филм од 1946)

Од Википедија — слободната енциклопедија
Прејди на прегледникот Прејди на пребарувањето

Животот е прекрасен (англиски: It's a Wonderful Life) - американски филм од 1946, во режија на Френк Капра по сценариото на Френсис Гудрич и Алберт Хакет. Главните улоги ги играат: Џејмс Стјуарт, Дона Рид, Тод Карнс, Томас Мичел, Хенри Трејверс и Лајонел Баримор. Во 1947 година, филмот бил номиниран за наградата „Оскар“ во пет категории, но не победил во ниту една. Сепак, истата година, Капра ја освоил наградата „Златен глобус“. Во 1990 година, филмот бил сочуван во Националниот филмски регистер на САД.[1]

Синпосис[уреди | уреди извор]

Група деца си играат на мразот и едно од нив, Хери Бејли (го игра Карнс) пропаѓа во водата и почнува да се дави, но го спасува неговиот постар брат Џорџ Бејли (го игра Стјуарт). Џорџ работи во аптека и еден ден, аптекарот, кој е вознемирен поради веста за смртта на синот, го испраќа да однесе лек во домот на едно болно дете. Џорџ забележува дека аптекарот по грешка ставил отров во лекот и поради тоа не го доставува и така му го спасува животот на детето. По завршувањето на средното училиште, Џорџ планира да патува низ светот, но наеднаш умира татко му и тој го презема раководството на штедно-кредитната задруга. Џорџ добро ја води задругата и четири години подоцна, кога брат му Хери се враќа од колеџот, Џорџ повторни планира да отпатува, надевајќи се дека брат му ќе го преземе семејниот бизнис. Меѓутоа, Хери се оженил и прифатил да работи во фабриката на таткото на својата сопруга. Така, Џорџ повторно е принуден да остане во родното место, Бедфорд Фолс. Наскоро, тој се жени со Мери Хеч (ја игра Рид), тие добиваат деца и живеат среќен семеен живот. Истовремено, Џорџ успешно раководи со штедно-кредитната задруга и им помага на многу сиромашни луѓе да дојдат до свој дом. Притоа, тој им се спротивставува на напорите на богатиот Потер (го игра Баримор) кој сака да ја преземе или да ја уништи штедно-кредитната задруга. Наеднаш, на Бадник, настанува целосна промена во животот на Џорџ, зашто стрико му по грешка му ги дава на Потер сите пари од задругата, и тоа дента кога во задругата е пристигнат банкарскиот супервизор. Очаен, Џорџ се враќа дома нервозен и се однесува грубо кон децата и жената, а потоа оди да бара заем од Потер, но тој безмилосно го одбива. Соочен со обвинение за измама, Џорџ нема никаков излез и пијан оди на мостот со намера да се фрли во реката. Меѓутоа, сето тоа го гледа св. Јосиф кој му се обраќа за помош на Господ, а тој го испраќа ангелот Кларенс (го игра Трејверс) да му помогне на Џорџ. Кларенс се фрла во реката и Џорџ скока по него за да го спаси. Тогаш, ангелот му го соопштува својот идентитет, но Џорџ не му верува и посакува никогаш да не се родел. Ангелот му ја исполнува желбата, а Џорџ ги согледува страшните последици од таквиот живот: градот, кој сега се вика Потерсвил, е под целосна контрола на Потер; насекаде се отворени ноќни барови и други локали за забава; луѓето се злобни; неговиот дом не постои; братм му се удавил кога бил дете; а жена му е стара мома која никогаш не се омажила. Никој во градот не го познава Џорџ и тој мисли дека сите полуделе така што предизвикува нереди. Полицијата го гони, а тој се враќа на мостот, молејќи се да му се врати стариот живот. Кога се враќа дома, таму го чека обвинителот со налог за апсење, но тогаш во куќата влегуваат жена му и стрико му, носејќи кошница со пари. Потоа, во куќата пристигнуваат многу жители од градот, кои собрале пари за да го спасат Џорџ, како и брат му Хери кој добил орден за херојството за време на Втората светска војна. Во кошницата се наоѓа и една книга која му ја оставил Кларенс.[2]

Наводи[уреди | уреди извор]