Епидемија на хантавирус на бродот „Хондиус“
| Епидемија на хантавирус на бродот „Хондиус“ | |
|---|---|
 Бродот „Хондиус“ кај Шпицберген во јуни 2025 г. | |
| Заболување | хантавирусна зараза, вклучително и хантавирусен белодробен синдром |
| Вирусен сој | вирус Андес[1] |
| Настапила | 1 април 2026 – сѐ уште[2] |
| Досегашни случаи | 6[3] |
| Сомнителни‡ | 8[4] |
Мртви | 3[4] |
| ‡ Сомнителните случаи се оние за кои лабораториските испитувања сè уште немаат потврдено дека страдаат од дадениот сој на болеста, иако можноста за некои други соеви може да е отфрлена. | |
Во април 2026 г., на холандскиот брод за крстарење „Хондиус“ била утврдена епидемија на хантавирусна зараза предизвикана од вирусот Андес. Бродот испловил од Ушуаја, Аргентина, на 1 април 2026 г. Првиот смртен случај се случил на 11 април, а телото на починатиот патник било изнесено од бродот тринаесет дена подоцна на островот Света Елена, каде што се симнала и неговата сопруга. Таа починала два дена подоцна во болница во Јоханесбург. Трет патник починал на самиот брод, додека еден британски државјанин бил префрлен во Јоханесбург во критична, но стабилна состојба.
По одобрението од шпанските здравствени власти, бродот на 6 мај се упатил кон Тенерифе, каде што патниците ќе бидат евакуирани во нивните матични земји. Претходно, бродот бил закотвен во Праја, Зелен 'Рт, откако претседателот на Канарските Острови, Фернандо Клавихо, првично се спротивставил на пристигнувањето поради загриженост за безбедноста на месното население. Американскиот Центар за контрола и превенција на болести (CDC) ја класифицирал епидемијата како итен одговор од „ниво 3“.
Вирусот Андес е единствениот познат хантавирус што може да се пренесе преку директен контакт меѓу луѓе. Иако ваквиот пренос е редок и обично бара долготраен близок контакт, СЗО нагласила дека ризикот од поширока епидемија е низок. До 8 мај 2026 г., патниците се хоспитализирани во Јужна Африка, Холандија, Германија, Света Елена, Шпанија и Швајцарија.
Заднина
[уреди | уреди извор]Хантавирус
[уреди | уреди извор]Постојат повеќе од педесет вида хантавируси што главно ги заразуваат глодачите, а повремено и луѓето.[5] Кај глодачите, заразата е истрајна, но без симптоми, а вирусот се шири преку нивниот измет, урина или плунка.[6] Кај луѓето, вирусот Андес најчесто предизвикува хантавирусен белодробен синдром — тешка болест што ги напаѓа срцето и белите дробови.
На 6 мај било потврдено дека токму вирусот Андес, карактеристичен за Јужна Америка, е одговорен за оваа епидемија.[7] Преносот на бродот „Хондиус“ делумно му се припишува на ширењето од човек на човек.[8]
Бродот „Хондиус“
[уреди | уреди извор]Бродот е во сопственост на холандската компанија Oceanwide Expeditions.[9] Има капацитет за 196 патници и 72 члена на екипажот. Планот на патувањето предвидувало посета на Антарктикот и изолираните острови во Јужниот Атлантски Океан. На бродот имало патници од 23 националности, претежно од Шпанија, Франција, Обединетото Кралство и САД, додека екипажот во голем дел бил од Филипините. Немало македонски државјани.[10]
Тек на епидемијата
[уреди | уреди извор]
Бродот испловил на 1 април, а веќе на 6 април кај 70-годишен Холанѓанец се појавиле првите симптоми.[11] Тој починал на 11 април, но тогаш смртта била припишана на природни причини. По застанувањето на Света Елена на 24 април, околу 30-40 патници се симнале од бродот пред да започне официјалното следење на контактите.
На 26 април, вдовицата на првиот починат се обидела да се качи на лет од Јоханесбург за Амстердам, но била отстранета од авионот поради лоша здравствена состоба и починала истиот ден во болница. Бродот продолжил кон островот Вознесение, каде уште еден патник бил евакуиран. На 2 мај на бродот починала и една жена од Германија.
По пристигнувањето во Праја на 3 мај, властите на Зелен 'Рт воспоставиле изолациона зона и испратиле медицинска помош. До 8 мај, Светската здравствена организација потврдила шест случаи на зараза и три смртни случаи поврзани со овој настан.
Наводи
[уреди | уреди извор]- ↑ „Hondius ship hantavirus Andes strain“. CBC News. Посетено на 10 мај 2026.
- ↑ „Hantavirus cluster linked to cruise ship travel, Multi-country“. СЗО. 4 мај 2026. Посетено на 10 мај 2026.
- ↑ „WHO reports six confirmed hantavirus cases tied to Spain-bound cruise“. Reuters. 8 мај 2026. Посетено на 10 мај 2026.
- 1 2 Sample, Ian (7 мај 2026). „Where did the cruise ship hantavirus come from and what happens next?“. The Guardian. Посетено на 10 мај 2026.
- ↑ Douglas KO, Payne K, Sabino-Santos G Jr, Agard J (23 декември 2021). „Influence of Climatic Factors on Human Hantavirus Infections in Latin America and the Caribbean: A Systematic Review“. Pathogens. 11 (1): 15. doi:10.3390/pathogens11010015. PMID 35055965 Проверете ја вредноста
|pmid=(help). - ↑ Aikman, Ian (5 мај 2026). „Hantavirus strain that spreads between humans found in cruise ship passengers“. BBC News. Посетено на 10 мај 2026.
- ↑ Parakozov, Sfundo; Peyton, Nellie (6 мај 2026). „Hantavirus-hit cruise ship to sail to Spain; rare Andes strain confirmed“. Reuters.
- ↑ Roberts, Michelle (7 мај 2026). „How worried should we be about getting Hantavirus?“. BBC News. Посетено на 10 мај 2026.
- ↑ Asadu, Chinedu; Risemberg, Annie (5 мај 2026). „Inside the cruise ship at the center of a rare hantavirus outbreak“. AP News. Посетено на 10 мај 2026.
- ↑ „Епидемија на хантавирус на бродот „Хондиус": Анализа на состојбата“. time.mk. Архивирано од изворникот 2026-05-09. Посетено на 2026-05-09.
- ↑ Carroll, Rory; Jones, Sam (7 мај 2026). „Global race under way to trace passengers who left hantavirus ship before outbreak confirmed“. The Guardian. Посетено на 10 мај 2026.
Надворешни врски
[уреди | уреди извор]- HantavirusMap — Карта во живо на случаи на хантавирус во светот, вести и маршрутата на бродот „Хондиус“.
- VesselFinder — Моментална положба на бродот „Хондиус“ на карта.
- „Hantavirus cluster linked to cruise ship travel, Multi-country“. Disease Outbreak News (англиски). Светска здравствена организација. 4 мај 2026. Посетено на 6 мај 2026.