Дороти Филдс
| Дороти Филдс | |
|---|---|
 Филдс заедно со Артур Шварц во (1951) | |
| Роден(а) | јули 15, 1904 Аленхерст, Њу Џерси, САД |
| Починал(а) | март 28, 1974 (возр. 69) Њујорк, САД |
| Занимање | Либретист и текстописец |
| Сопружник | Ели Лам (во брак од 1939) |
| Родители | Лу Филдс |
Дороти Филдс (15 јули 1904 – 28 март 1974) била американска либретистка и текстописец. Таа напишала повеќе од 400 песни за бродвејски мјузикли и филмови. Нејзините најпознати дела се: Начинот на кој изгледаш вечерва (The Way You Look Tonight) – 1936, Убава романса (A Fine Romance) – 1936, На сончевата страна од улицата (On the Sunny Side of the Street) – 1930, Не ме обвинувај мене (Don't Blame Me) – 1948, Подигни се сам (Pick Yourself Up) – 1936, Во расположение сум за љубов (I'm in the Mood for Love) – 1935, Не можше да бидеш послатка (You Couldn't Be Cuter) – 1938, Голем трошаџија (Big Spender) – 1966
Во текот на својата кариера, таа соработувала со разни влијателни личности во американскиот музички театар, вклучувајќи ги Џером Керн, Сај Колман, Ирвинг Берлин и Џими Мекхју. Заедно со Ен Ронел, Дана Суес, Бернис Петкере и Кеј Свифт, била една од првите успешни жени текстописци на „Тин Пен Али“ и во Холивуд.
Ран живот
[уреди | уреди извор]Филдс била родена во Аленхерст, Њу Џерси, а пораснала во Њујорк.[1] Во 1923 година, Филдс дипломирала на училиштето за девојчиња „Бенџамин“ во Њујорк. На училиште, била одлична по предметите англиски јазик, драма и кошарка. Нејзините песни биле објавени во училишното списание.
Нејзиното семејство беше вклучено во шоу-бизнисот. Нејзиниот татко, Лу Филдс, бил еврејски имигрант од Полска кој соработувал со Џо Вебер како едно од најпопуларните комедиски водвиљ дуа кон крајот на деветнаесеттиот век. Кога дуото се разделило во 1904 година, Лу Филдс станал еден од највлијателните театарски продуценти на своето време. Од 1904 до 1916 година, тој продуцирал околу 40 бродвејски претстави и го нарекувале „Кралот на музичката комедија“ поради неговите достигнувања. Нејзината мајка била Роуз Харис. Филдс имала двајца постари браќа, Џозеф и Херберт, кои исто така биле успешни на Бродвеј: Џозеф како писател и продуцент и Херберт како писател кој подоцна станал соработник на Дороти.
И покрај нејзините природни семејни врски со театарот преку нејзиниот татко, тој не го одобрувал нејзиниот избор да се занимава со глума и се обидувал да ја спречи да стане сериозна глумица. На почеокот не ѝ дозволил да прифати работа во акционерска компанија во Јонкерс. Оттука, Дороти почнала да работи како наставничка и лабораториски асистент, додека тајно доставувала дела до списанија.
Кариера
[уреди | уреди извор]На почетокот на нејзината кариера, Филдс се појавила на сцената со англиската глумица и позната личност Силвија Ешли како „Сили и Доти“ во „Полноќни лудории (Midnight Follies)“ во Лондон Метропол, по што следеле „Кажи ми повеќе (Tell me More)“ во Зимските градини во Лондон и „Целиот град зборува (The Whole Town's Talking)“.
Во 1926 година, Филдс се запознала со популарниот композитор на песни Џ. Фред Кутс, кој предложил да почнат да пишуваат песни заедно. Всушност, ништо не произлегло од оваа интеракција; сепак, Кутс ја запознал Филдс со друг композитор и изведувач на песни, Џими Мекхју.[2]
Кариерата на Филдс како професионален текстописец започнала во 1928 година кога Џими Мекхју, кој видел некои од нејзините рани дела, ја поканил да му напише неколку текстови за „Црни птици од 1928 г. Претставата, во која глуми Аделаид Хол, станала хит на Бродвеј. Филдс и Мекхју соработувале до 1935 година. Песни од овој период се „Не можам да ти дадам ништо освен љубов“ (1928), „Токму како тебе“ (1930) и „На сончевата страна од улицата“ (1930). Во текот на доцните 1920-ти, таа и Мекхју напишале специјални нумери за разните ревии на „Котон клуб“, од кои голем број снимил Дјук Елингтон.
Во средината на 1930-тите, Филдс почнала да пишува текстови за филмови и соработувала со други композитори, вклучувајќи го и Џером Керн. Со Керн, работела на филмската верзија на Роберта, а исто така и на нивниот најголем успех, „Време за Свинг (Swing Time)“. Песната „Начинот на кој изгледаш вечерва“ му донела на тимот на Филдс/Керн Оскар за најдобра оригинална песна во 1936 година.
Филдс ги напишала текстовите за песните во филмот од 1936 година „Кралот излегува“, кој се базира на раните години на царицата Елизабета Баварска, во режија на Јозеф фон Штернберг.
Филдс се вратила во Њујорк и повторно работела на бродвејски претстави, но сега како либретист, прво со Артур Шварц на „Ѕвезди во твоите очи“. (Тие повторно се здружиле во 1951 година за „Дрво расте во Бруклин“.) Во 1940-тите, поќнала да работи со својот брат Херберт Филдс, со кого ги напишала сценаријата за три мјузикли на Кол Портер, „Да се соочиме со тоа!“. , Нешто за момчињата и Мексиканска забава со Хејрајд.
Во 1945 година, Филдс им се обратила на Ричард Роџерс и Оскар Хамерштајн II со својата идеја за нов мјузикл базиран на животот на познатата стрелачка Ени Оукли. Идејата им се допаднала и се согласиле заеднички да ја продуцираат претставата. Керн и Филдс биле договорени да ги напишат песните во шоуто. Керн починал пред да можат да почнат да работат на проектот, а Ирвинг Берлин го заменил.
Заедно со Херберт го напишале сценариото за „Ени земи го својот пиштол“, додека Берлин ја обезбедил музиката. Претставата, во која глумела Етел Мерман, имала огромен успех, прикажувајќи 1.147 изведби.[2]
Во 1950-тите, нејзиниот најголем успех била претставата „Црвенокоса“ (1959), која освоила пет награди „Тони“, вклучувајќи ја и наградата за најдобар мјузикл. Кога почнала да соработува со Сај Колман во 1960-тите, нејзината кариера тргнала во нов правец. Нивното прво заедничко дело беше „Слатка Черити (Sweet Charity)“. Нејзиниот последен хит бил од нивната втора соработка во 1973 година, „Клацкалка (Seesaw)“. Претставата имала премиера на Бродвеј на 18 март 1973 година, а престанала да се прикажува на 8 декември 1973 година. Најпрепознатлива песна била „Не е важно каде почнуваш, туку каде завршуваш“.
Во текот на својата 48-годишна кариера, Филдс била коавторка на повеќе од 400 песни и работела на 15 сценски мјузикли и 26 филмови. Нејзините текстови биле познати по силна карактеризација, јасност во јазикот и хумор. Таа била аматерска пијанистка и доживотен љубител на класичната музика; свеста за мелодиските линии била од голема вредност при прилагодување на текстовите на мелодиите.[2]
Филдс долго време била релевантна како текстописец, поради нејзината имагинација и нејзината подготвеност да се прилагоди на променливите трендови во американскиот музички театар.[2]
Филдс е член на Американската Театарска Хала на Славните, примена постхумно во 1988 година.[3]
Личен живот
[уреди | уреди извор]Филдс била високо дисциплинирана во работата. Познато е дека поминувала околу осум недели истражувајќи, дискутирајќи и водејќи белешки за проект пред конечно да се врати на своето вообичаено работно време од 8:30 до 16:30 часот.[2]
Филдс починала од срцев удар на 28 март 1974 година, на 69-годишна возраст. „Њујорк тајмс“ објавил „Дороти Филдс, разновиден текстописец чија кариера траеше речиси 50 години, почина од срцев удар синоќа во својот дом овде.“[4] Таа била сестра на писателите Херберт и Џозеф Филдс. Со Ели Лам ја запознал неговиот близок пријател Херберт Сондхајм, таткото на Стивен Сондхајм, кој со љубов ја нарекувал тетка Дороти додека растел. Филдс се омажила со Лам во 1939 година и имале две деца, Дејвид (џез пијанист) и Елиза. Лам починал во 1958 година.[2]
Наводи
[уреди | уреди извор]- ↑ Klein, Alvin; Emblen, Mary L. (October 4, 1992). „New Jersey Guide“. The New York Times.
- 1 2 3 4 5 6 „Dorothy Fields | The Stars | Broadway: The American Musical“. Broadway: The American Musical. PBS. Посетено на April 22, 2016.
- ↑ „Theater Hall of Fame Adds Nine New Names“. The New York Times. November 22, 1988. Посетено на February 6, 2019.
- ↑ „Dorothy Fields, Lyricist, Dies“. The New York Times. March 29, 1974. стр. 38.
Надворешни врски
[уреди | уреди извор]
- Dorothy Fields Архивирано на 2 јуни 2021 г. at the Songwriters Hall of Fame
- Dorothy Fields Papers, 1911–1977, Billy Rose Theatre Division, New York Public Library for the Performing Arts
- Dorothy Fields Scripts, 1927–1973, Billy Rose Theatre Division, New York Public Library for the Performing Arts
- Dorothy Fields recordings at the Discography of American Historical Recordings.