Дневни светла

Од Википедија — слободната енциклопедија
Прејди на прегледникот Прејди на пребарувањето
Дневни ЛЕД светла на Ауди Р8
Дневни ЛЕД светла на БМВ од класата 6

Дневни светла – делови на моторни возила на предниот дел на возилото кои емитуваат бела светлина и автоматски се палат при вклучување во работа на возилото за да се зголеми забележливоста на возилото. Од 7 февруари 2011 година се задолжителни за новопроизведените возила. Денес производителите се обврзани да ги опремуваат со вакви светла лесните и малите товарни возила.

Намена[уреди | уреди извор]

За разлика од соборените светла чија основна намена е возачот да може да го гледа патот пред себе, намената на дневните светла е возилото да биде лесно забележливо од другите учесници во сообраќајот, особено при разминување, со што се зголемува безбедноста во сообраќајот.

Безбедносни придобивки[уреди | уреди извор]

Од седумдесеттите години на XX век направени се бројни студии ширум светот чии заклучоци се дека запалени светла дење ја подобруваат безбедноста.[1][2][3]

Ефект на амбиенталната светлина[уреди | уреди извор]

Користење на светла дење најпрво е воведено, и најпрво се забележани безбедносните придобивки, во скандинавските земји каде е постојано мрачно во текот на зимата. Колку дневната светлина е појака, толку е помала безбедносната придобивка, додека потребниот интензитет на дневните светла за зголемување на безбедноста се зголемува. Така безбедносната придобивка од дневните светла во релативно мрачните нордиски земји е отприлика трипати поголема отколку придобивката во релативно светлата Америка.[1]

Влијание на околината[уреди | уреди извор]

Дневни ЛЕД светла на Ауди А4

Потрошувачката на енергија многу зависи од употребената технологија. Некои системи не надминуваат 8 W (ЛЕД), додека други надминуваат и 200 W (жарулките во фаровите). Меѓународните регулативни тела, особено во Европа, работат на изнаоѓање рамнотежа меѓу зголемената безбедност и зголемувањето на потрошувачка на гориво заради нивното користење. Заради тоа што потребната електрична енергија за функционирање на светлата ја произведува моторот, доаѓа до зголемена потрошувачка на гориво, а со тоа и зголемување на издувните гасови (CO2). Во зависност од интензитетот на сообраќајот зголемениот јаглероден диоксид може да биде доволен за да го загрози протоколот од Кјото.[4] Заради ова, форсирани се решенија со мали моќности, а користењето на моќните соборени светла и магленки не се дозволени за возилата произведени од 2011 година. Потрошувачката на гориво може значително да се намали со користење на 8 до 20 ватни наменски дневни светла засновани на ЛЕД или високоефикасни светилки.

Регулатива во Европската Унија[уреди | уреди извор]

Директиваа 2008/89/ЕК на Европската Унија бара сите патнички возила и мали доставни возила одобрени после 7 февруари 2011 година во Европската Унија да бидат опремени со посебни дневни светла.[5][6][7] Обврската е проширена со камионите и автобусите во август 2012 година.[8] Функционална замена, како соборени светла или магленки како дневни светла, не е дозволена.[9] Европската директива бара функционални посебни дневни светилки кои се во согласност со Регулативата 87 и монтирани на возилото во согласност со Регулативата 48.[10] Дневните светла што се во согласност со Р87 емитираат бела светлина меѓу 400 и 1200 кандели.[11]

Употребата на светла во текот на денот зависи од регулативата на поедините земји. Во некои задолжително е користење на светла дење вон населени места, во некои во текот на зимата, а постојано задолжителни се во следниве земји (нецелосен список): Австрија, Данска, Естонија, Исланд, Италија, Кипар, Летонија, Литванија, Македонија, Молдавија, Норвешка, Полска, Словенија, Србија, Унгарија, Финска, Црна Гора, Чешка, Швајцарија и Шведска.

Во Македонија употребата на посебни дневни светла не е законски регулирана, а користењето на светла дење е определено со Законот за безбедност на сообраќајот на патиштата според кој „Во сообраќај на пат, дење и ноќе, за време на управување со возилото, возачот на возилото задолжително треба да ги има запалено најмалку соборените светла за осветлување на патот.“ [12]

Поврзано[уреди | уреди извор]

Наводи[уреди | уреди извор]

  1. 1,0 1,1 A Review of Daytime Running Lights PDF (1.7 MB)
  2. Review of the Literature on Daytime Running Lights
  3. IIHS: North American DRL studies
  4. DRL fuel consumption calculations
  5. Europa.eu Press Release "New cars equipped with daytime running lights as of today"
  6. EU to make DRLs mandatory from 2011
  7. „AL-Automotive Lighting DRL info“. Архивирано од изворникот на 2009-04-29. Посетено на 2016-01-03.
  8. European Commission Enterprise and Industry web page on DRLs
  9. DRL Mandate Takes Effect in Europe, R48 Countries (subscription required)
  10. E.U. Directive 2008/89/EC
  11. „ECE Regulation 87, Revision 2“ (PDF). Архивирано од изворникот (PDF) на 2017-07-12. Посетено на 2016-01-03.
  12. Службен весник - Закон за безбедност на сообраќајот на патиштата

Надворешни врски[уреди | уреди извор]