Ден на галициската книжевност

Денот на галициската книжевност (галициски: Día das Letras Galegas) е јавен празник кој се слави во Галиција, Шпанија. На овој ден, кој беше воспоставен од страна на Кралската галициска академија (галициски: Real Academia Galega) во 1963 година, се чествува галицискиот јазик и неговата книжевност. Прославата секоја година се одржува на 17. мај. Во 1991 година, Денот на галициската книжевност е прогласен за јавен празник во цела Галиција.

Првата прослава во 1963 година ја одбележа стогодишнината од објавувањето на „Галициски песни“ (галициски: Cantares gallegos) од Розалија де Кастро (1837 - 1885), првото дело на галициски јазик. Де Кастро е еден од најважните поети во Галиција. „Галициски песни“ е објавена на 17. мај 1863 година.

Денот на галициската книжевност секоја година е посветен на различен писател кој творел на галициски јазик. Посветувањето е само на автори кои починале пред повеќе од 10 години пред годината кога се чествуваат, а изборот го прави Кралската галициска академија. Единствено во еден случај, Денот на галициската книжевност беше посветен на заедничко чествување на повеќемина автори -- во 1998 година заедно беа прославени делата на Мартин Кодаш, Жуан де Кангас и Мендињо. Овие поети беа избрани како претставници на средновековната литература (кантиги).