Градиште (Опила)

Градиште — археолошко наоѓалиште во кривопаланечкото село Опила. Претставува градиште од доцноантичко време. Прогласено е за културно наследство на Македонија.

Опис

Се наоѓа на десниот брег на Крива Река, на висок рид што доминира над околината, со правец на протегање север-југ и димензии од околу 100 х 40 м. На северната страна се гледа вештачки направен ров, додека другите три страни се многу стрмни. Карактеристично за ридот, а со тоа и за самото наоѓалиште, е тоа што има структура од мека карпа во која се исклепани повеќе простории, скали, ниши и сл. Во подножјето на западната страна има остатоци од цистерна. Од утврдувањето потекнуваат повеќе монети од III и IV век кои се чуваат во Музејот на Македонија во Скопје. По површината се среќаваат фрагменти од керамички садови, питоси, фрагменти од стакло, бронза, железо и друг археолошки материјал. Во контекстот на градиштето треба да се имаат предвид и наоѓалиштата Чифлик, некропола од доцноантичкото време, и Чифличиште, населба од истото време, кои се наоѓаат во непосредната околина. Се претпоставува дека Градиште бил значаен населбински и фортификациски пункт што се наоѓал на комуникациите Стоби-Пауталија и Скупи-Пауталија.

Поврзано

• Градеж — населба од доцноантичкото време;
• Градиште — градиште од доцноантичкото време;
• Мал Трг — градиште од доцноантичкото време;
• Пашина Падина — населба од доцноантичкото време;
• Селиште — населба од доцноантичкото време;
• Чифлаџиште — населба од доцноантичкото време;
• Опила;
• Список на археолошки наоѓалишта во Кривопаланечко;
• Список на средновековни некрополи во Македонија.