Голф-опрема
За играње на голф постои разна опрема.
Палки[уреди | уреди извор]
Играчот обично носи неколку палки во играта (но не повеќе од 14, според правилата). Постојат три главни видови на палки: дрва, железа и вметнувачи (патери). Клиновите се железа кои се користат за пократки удари. Дрвата се користат за подолги удари од подметката или фервејот, и понекогаш во грубиот терен, додека пак железата се за прецизни удари од фервеи и од грубиот терен. Постојат и „хибридни“ дрва кои ги комбинираат правоударните одлики на железата со лесно подигачките одлики на понакосените дрва. Често се користат за подометни удари. Хибридите се користат и за играчи кои имаат потешкотии со подигање на топката во воздух со подолги железа. Киновите се користат на потешки места како песок или груб терен и за приодни удари кон зеленилото. Вметнувачите главно се користат на зеленилото, но корисни се и во бункери или за некои приодни удари. Вметнувачот има минимална накосеност, за топката да може да се тркала по површината при удар.
Рачки[уреди | уреди извор]
Рачката се наоѓа помеѓу главата и дршката. Профилот ѝ е кружен по поблик и таа е подебела кај дршката отколку кај главата. За нејзина изработка се користи каков било црвст и лесен материјал. Денес речиси сите рачки се изработуваат од графит или кален челик. Некои играчи сметаат дека затеснувањето на рачката е важно. Тоа може да биде мазно или скалесто.
Правилата дозволуваат рачката на вметнувачот да биде искривена на извесни начини, но сите други палки мора да бидат прави.
Топчиња[уреди | уреди извор]
Минималниот дозволен пречник на топче за голф изнесува 42.67 mm, а не смее да е потешко од 45.93 g. Современите топчиња може да се двослојни, трислојни или четирислојни, направени од разни синтетички материјали. По површината има 300-400 дупчиња за подобра аеродинамика. Методите на изработка и материјалите во голема мера влијаат врз играта со топката - на дометот, траекторијата, на вртежот и осетот. Потврдите материјали како Сурлин, обично даваат поголем домет, додека помеките облоги како Балата, даваат повеѓе вртеж, повеќе осет и поголем потенцијал за запирање. Голф топчињата се делат на три групи зависно од изработката: двослојни, трислојни и четирислојни. Четирислојните се најскапи, иако цената не е сигурен показател за квалитет. Постојат и топки со вграден уред за радиочестотна идентификација, што им овозможува на играчите лесно да ги лоцираат топките со рачен трагач. Првите голф топки се правеле од кожа со пердуви.
Друга опрема[уреди | уреди извор]
Голф торби[уреди | уреди извор]
Палките се носат во голф торби. Направени се од најлон или кожа во цилиндричен облик околу пластична рамка. Имаат неколку џебови за носење на разна опрема и други потребности за една партија голф. Торбите можат да се носат, да се влечат на голферски носач со две тркала или да се стават на моторизирана голф количка. Имаат рачка за рака и ремен за околу рамо, а понекогаш и ногарки на расклопување за да можат да седат исправени за време на играта.
Одбележувачи на топчиња[уреди | уреди извор]
На теренот топчето може да се подигне за чистење или ако му пречи на противникот при вметнување; неговата местоположба потоа мора да се обележи со одбележувач (обично сплескано кружно парче пластика или монета).
Голф колички[уреди | уреди извор]
Играчите и торбите можат да се пренесуваат во голф колички. Тоа се моторизирани возила на кои се возат луѓето и се стават торбите.
Ракавици[уреди | уреди извор]
Голферите носат ракавици против плускавци. Обично се носи само една (лева за деснаци, десна за леваци).
Чевли[уреди | уреди извор]
За голф се носат посебни чевли со менливи шилци, со цел за подобро држење на зеленило и воопшто на влажни услови.
Вила[уреди | уреди извор]
Мала вила се користи за поправање на вдлабнатината која топчето ја прави паѓајќи на земја. Некои подметки имаат ваква алатка на крајот. За поправка на вдлабнатината, алатката се пикнува до одбележувачот и се притиска нагоре од сите страни, разлабавувајќи го набиениот бусен за брзо растење на тревата, а потоа се зарамнува со мазното рамно дно на вметнувачот за израмнување на површината за вметнување.
Подметки[уреди | уреди извор]
Подметките за голф (наречени ти) личат на клинци со мали чашки врз нив и се прават од дрво или пластика. Подметката е предмет кој се пикнува во трева и топчето се става врз него за полесен удар; меѓутоа ова се дозволува само при првиот удар за секоја дупка.