Геверкенег

Замокот Геверкенег е замок во центарот на Идрија, Словенија. Првично изграден за поддршка на рудникот за жива, денес е општински музеј.

Историја

Со откривањето на живата во Идрија кон крајот на 15 век, активностите поврзани со рударството наскоро почнале да го обликуваат градот и неговите околни области. Замокот Геверкенег бил изграден помеѓу 1522 и 1533 година од страна на сопствениците на рудникот, со цел да се поддржат рударските активности. Неговото име е изведено од германски за да опише „рударски замок“. За разлика од повеќето други замоци од истата ера, замокот Геверкенег никогаш не служел за феудални или воени цели, ниту бил користен како резиденција за благородништво. Неговата примарна улога била да биде складиште за ископуваната жива, и да обезбеди канцелариски простор за управата на рудникот. Служел како магацин сè додека не било изградено ново складиште за жива во градот на крајот на 18 век. Во моментов замокот е еден од најстарите градби во Идрија, и тој сега служи како општинскиот музеј. Музејот е отворен во 1953 година и се простира на речиси 2000 m².^[1]^[2]

Локација и структура

Замокот се наоѓа на мал рид во западната страна на градот. Неговата структура е приближно во правоаголна форма, со три одбранбени кули позиционирани во северозападното, североисточното и југоисточното ќоше. Јужната страна се граничи со стрмна карпа во непосредна близина на потокот Никова, затоа југоисточното ќоше нема кула, и е едноставно зголемен дел од спојните ѕидови. Ќошињата се поврзани со ѕидови кои ги содржат и главните простории. Во средината на источниот ѕид се наоѓа саат-кула. Замокот има два влеза: од источната страна се пристапува со скали и мост преку притоката, а од западната страна се пристапува од патот и директно води во дворот.