Владимир Ангеловски

Владимир Ангеловски - Дади
Роден	22 мај 1946 Скопје
Починал	15 ноември 2012 Скопје
Националност	Македонец
Познат	по улогата во: Трст виа Скопје Викенд на мртовци Солунски патрдии Македонски народни приказни Хихирику Каца Пусто турско Училиште за кловнови
Занимање	глумец

Владимир Ангеловски, или уште познат како Дади (22 мај 1946, Скопје - 15 ноември 2012, Скопје), бил еден од најголемите македонски глумечки имиња. Многу добро го познаваат како постарите, така и помладите генерации. Роден глумец, но сосема нетипичен глумец. Цел живот во Драмски театар - Скопје, со излети на “осмиот колосек” наречен естрада. За себе велел дека е глумец уште од своето раѓање.

Животопис

Владимир Ангеловски - Дади е роден на 22 мај 1946 год. во Скопје како втор син во семејството на Борис и Костадинка Ангеловски. Татко му попот Борис имал свој црковен хор и прв ја направил комплетната црковна богослужба со ноти и на македонски јазик, а мајка му била учителка во основното училиште „Кирил и Методиј“. Неговиот постар брат Коле Ангеловски на македонската јавност и е познат како извонреден режисер и актер со кој В.А.-Дади има соработувано многупати.

Првите почетоци

Првите чекори кон својата идна професија Дади ги имал во Радио драмата, додека пак за првпат на сцената стапнал во 1962 година, кога го играл Оливер Твист кај режисерот Димитрие Османли во тогашниот Младинско-детски театар, денес Драмски театар - Скопје. И тука се раѓа неговата голема љубов кон театарот. Како гимназијалец во “Цветан Димов “ одел на голем број натпреварувања низ Југославија што всушност биле и неговите први естрадни почетоци. По гимназијата се подготвувал да оди на Академија во Белград, но тоа не се случило. Имено на Драмскиот театар во тоа време му биле потребни глумци па така Дади бил ангажиран во претставата „Принцот и просјакот“ и истата 1966 година станува и член на драмскиот театар.

Некои позначајни улоги

Огромен е бројот на улогите во кои се појавува Дади, почнувајќи од детските серии и драми, па сè до сериозните улоги во некои од најзначајните македонски филмови, драми и серии. Секако дека не постои дете кое ја нема гледано познатата детска трилогија „Чук, чук Стојанче”, „Баш челик” и „Шекспир во приказни” која постигнува огромни успеси и тука и на сцените низ Југославија. Незаборавни се и ликовите Диди и Дади кои ги играат Дади и неговиот брат Коле Ангеловски во тв серијата „Да видам, да видам што да бидам”. Исто така Дади се појавува и во операта на МНТ во оперите „Шеќерна приказна” и „Деспина и мистер Докс”. Во 1967 година игра во психолошкиот филм „Мементо” во режија на Османли Димитрие, а во 1988 игра една од главните улоги во филмот „Викенд на мртовци”.

Понатаму следуваат улогите во филмовите „Солунски патрдии”, во режија на Коле Ангеловски, „Калигула” во режија на Миле Гроздановски, „Рибарски караници”, серијата „Лото, лото” исто така во режија на Коле Ангеловски, во претставите „Мефисто”, и „Дунек” со кои заработува и некои од неговите награди. Тука се и сериите: „Агенција осамени срца”, „Училиште за кловнови”, „Трст виа Скопје“, „Битолски лакрдии” и многу дриги.

Неизбежно е а да не се спомене радио-телевизиската програма “Хихирику” со која што заедно со своите колеги Димче Мешковски, Катерина Крстева, Благоја Чоревски, Гоце Тодоровски и Катерина Коцевска во 2004-тата година го прославија јубилејот од 25 години од нејзиното постоење. Со некои од своите колеги има настапувано и неколкупати во Австралија изведувајки познати македонски драми за тамошните Македонци. Значајни се секако и улогите на Дади во голем број од Македонските народни приказни, а интересен е и фактот дека тој е единствениот глумец кој 9 години по ред настапува на манифестацијата Глумците пеат, колку што и постои самата манифестација.

Филмографија

Година	Филм	Улога
1960-ти▲
1967	Мементо ТВ-филм
1967	Да видам, да видам што да бидам ТВ-серија	Дади
1969	Волшебниот воз ТВ-серија
1969	Републиката во пламен ТВ-филм
1970-ти▲
1970	Детективи ТВ-серија
1971	Македонскиот дел од пеколот ТВ-филм
1973	Илустриран ТВ Речник ТВ-серија	Димо
1975	Сребрено јаболко ТВ-филм
1977	Итар Пејо ТВ-серија	Итар Пејо
1978	Сеќерна приказна ТВ-филм
1979	Наши години ТВ-серија
1979	Хихирику Радио-емисија
1980-ти▲
1980	Учителот ТВ-филм
1982	Црвено, жолто, зелено ТВ-серија
1984	Хихирику - 5 години (1984)
1984	Камчевци ТВ-серија
1985	На наш начин ТВ-филм
1985	Ајде да се дружиме ТВ-серија
1986	Солунски патрдии ТВ-серија	Цветан
1986-1988	Македонски народни приказни ТВ-серија
1987	Трст виа Скопје ТВ-серија	Попот
1987	Театарче лево ќоше ТВ-филм
1987	Училиште за кловнови ТВ-серија	Дади
1987	Претежно ведро ТВ-серија
1988	Чук, чук, Стојанче ТВ-серија
1988	Викенд на мртовци ТВ-серија	Климе Глупчев
1989	Цвеќе на карпата ТВ-филм
1989-1993	Еурека ТВ-серија
1990-ти▲
1990	Македонски народни приказни ТВ-серија
1990	Алф од Ново Лисиче ТВ-филм	Дедото
1990	Викенд на мртовци ТВ-филм
1991	Македонија може ТВ-филм	Владимир
1991	Во кафулето кај Гане ТВ-филм	Ангеле
1992	Тврдокорни ТВ-серија
1992	Чудовиштата во нашиот град ТВ-серија	Гази
1992-1995	Македонски народни приказни ТВ-серија
1994	Прекалени ТВ-серија
1995	Во светот на бајките ТВ-серија
1997	Калигула ТВ-филм
1996-1999	Македонски народни приказни ТВ-серија
1999	Време живот ТВ-филм
1999	Хихирику - 20 години
1999	Каца ТВ-филм	Полицаец 1
2000-ти▲
2000	Мајка Тереза ТВ-филм
2000-2001	Светот има осум страни ТВ-серија	/
2000-2001	Во светот на бајките ТВ-серија
2000-2003	Македонски народни приказни ТВ-серија
2001	Агенција осамени срца ТВ-серија	Злате Динго
2003	Битолски лакрдии ТВ-серија
2003	Лото, лото ТВ-серија
2004	Неверство во зимска ноќ ТВ-филм
2004	Хихирику
2004	Сакам да бидам кошаркар ТВ-филм	Судијата
2006	Пусто турско ТВ-филм	Димче
2008	Кукен совет ТВ-серија
2009	Ветар низ тополите ТВ-серија
2009	Седумка, љубов или смрт ТВ-филм	Кумот
2009	Балкан бенд ТВ-серија	Дада
2010-ти▲
2012	Македонски народни приказни ТВ-серија
2012	Скопје ремикс ТВ-филм	Човек од спот

„Викенд на мртовци“

Филмот е снимен во 1988 година, во стандард техника, со звук, во боја, 35 мм и е во времетраење од 94 минути. Филмот разработува една апсурдна ситуација кога поради невнимание во една болница се заменуваат умрените пациенти, па така две семејства добиваат туѓи мртовции кои треба да ги погребаат, па доаѓа до сплет на настаните. Филмот е во режија на Никола Коле Ангеловски, сценариото е на Миле Попоски а во главните улоги покрај Владимир Ангеловски се јавуваат и Ѓорѓи Јолевски, Димче Мешковски, Гоце Тодоровски и Благоја Чоревски.

Филмот е награден на филмскиот фестивал „Голубац“ во 1988 година, и тоа прва награда „Златна рипка“ за режија и трета награда од публиката.

„Солунски патрдии“

Оваа тв серија е снимена во 1985 година, во три епизоди со времетраење од по 55 минути. Жанрот е комедија, а режисер е братот на Дади - Коле Ангеловски. Покрај Дади ,кој се јавува во улогата на Цветан, во другите улоги се јавуваат и Благоја Спиркоски - Џумерко, Трајче Иваноски, Гоце Тодоровски, Димче Мешковски, Ванчо Петрушевски, Снежана Стамеска, Салаетин Билал, Стево Спасовски, Тодорка Кондова, Јовица Михајловски, Марин Бабиќ, Мите Грозданов и други.

„Лото, лото”

Оваа комична тв серија е едно од поновите телевизиски остварувања. Снимена е 2003 година во режија на Никола Ангеловски. Серијата се состои од 5 епизоди со времетраење од 40 минути. Главните улоги ги толкуваат Владимир Ангеловски, Благоја Спиркоски Џумерко, Бранко Бенинов, Владимир Талески, Андон Јовановски и др.

„Калигула”

Овиј филм е снимен 1997 година во режија на Миле Грозданоски, а во главните улоги се јавуваат Димче Мешковски, Владимир Ангеловски, Димитар Зози, Ѕвезда Ангеловска и Ѓорѓи Јолевски.

Награди

Владимир Ангеловски-Дади е наградуван уште од самите почетоци на својата кариера уште како дете бил трикратен првак на Југославија во детска радио драма. Некои од позначајните награди: 13-та Ноемвриска, Климент Охридски и на фестивалот Ристо Шишков, ги добива во последните 2-3 години.

Надворешни врски

• Владимир Ангеловски на Семрежната филмска база на податоци (англиски)