Вејачки на пченица
| |
| Творец | Гистав Курбе |
|---|---|
| Година | 1854 |
| Вид | Масло на платно |
| Димензии | 131 см × 167 см |
| Место | Музеј на уметноста во Нант, Нант |
Вејачки на пченица — слика од Гистав Курбе, насликана помеѓу 1854 и 1855 година[1] и изложена во Музејот на уметностите во Нант.
Опис[уреди | уреди извор]
Делото е масло на платно во формат на крајолик и со средна големина кое прикажува три лица во селска средина. Во средиштето на сликата, отпозади, се гледа млада жена облечена во црвен фустан, клечи, вее пченица, зрната се собираат на беж чаршав што го покрива практично целиот под. Лево, друга млада девојка, седната скрснозе, со бела марама на главата, изгледа малку сонливо, рачно треби пченица во голема чинија. Конечно, десно, седнато, младо момче ја испитува внатрешноста на веалка. Околу овие ликови има три големи вреќи, мало столче на кое спие мачка, прибор (земјен сад со лажица, бакарно котле, плетена корпа, чинија, дрвен сад...).
Крајно десно, може да се види затворена врата на која е поставена слика чиј мотив останува нејасен. Дневната светлина доаѓа од прозорец што не може да се види, но чија сенка може да се види на ѕидот.
Анализа[уреди | уреди извор]
Фокусна точка на композицијата, сместена во средината, е жената која клечи и му се наметнува на гледачот со својата речиси несразмерна големина, но и со енергијата и тензијата што таа ја развива и ја пренесува на целината. Со моќното елипсовидно движење што му го дава на решетото, со сензуалноста на нејзината положба, лице скриено, речиси анонимно, таа го исполнува целото платно со своето присуство, додека другите две лица се појавуваат како статисти.
Во однос на читањето, од лево кон десно, се гледа она што Линда Ноклин (1963) го превела како „слика за напредокот во областа на земјоделските активности: лево, рачно, неефикасно, заостанато одвојување на зрното од плевата; во средината понапредно и поенергично одвојување на зрното со користење на решето; […] на десната страна, механизација“: Така, Курбе оди подалеку од живописниот реализам за да ја достигне благородноста на „стварната алегорија“[2].
Историја на сликата[уреди | уреди извор]
Оваа слика Курбе ја насликал помеѓу 1853 и 1854 година во Орнан. Сликарот најпрво ја нарекол Вејачките или Децата на земјоделците од Ду.
Двете млади жени несомнено се двете сестри на Курбе: Зое (која ја вее пченицата) и Жилиет (која седи). Младото момче би можело да биде Дезире Бине, вонбрачниот син на сликарот.
Ова дело било првпат изложено во Парискиот салон во 1855 година, а потоа во 1861 година за време на деветтата изложба на Друштвото на пријателите на уметноста од Нант (Société des amis de l'art de Nantes), кое веднаш го купило делото во име на Музејот на уметностите во Нант (Musée des Beaux-Arts) на градот, за сума од 4 000 франка.
Наводи[уреди | уреди извор]
- ↑ „Les cribleuses de blé | Histoire et analyse d'images et œuvres“ (француски). Посетено на 2021-04-25.
- ↑ Cité par Emmanuel Gaillard, In: « Les cribleuses de blé », Histoire par l'image [en ligne], consulté le 26 Décembre 2017.
Надворешни врски[уреди | уреди извор]
| ||||||||||||||||||||
