Прејди на содржината

Бекрумс

Од Википедија — слободната енциклопедија
Бекрумс
Бекрумс
Жанркрипипаста

Бекрумс (англиски: The Backrooms, буквално: Задните простории) — градска легенда, интернет-мем и крипипаста за измислен свет, поточно за бескраен лавиринт од случајно поврзани канцеларии и помошни простории, кој предизвикува страв и вознемиреност поради својата невообичаена испразнетост.[1][2][3][4] Првичната верзија на Бекрумс потекнува од објава на корисник од 12 мај 2019 г. на популарниот 4chan во тематска нишка,[5] посветена на споделување слики што изгледаат вознемирувачки и застрашувачки.[1][3]

Бекрумс се претставени како ходници и соби прекриени со стари, еднолични теписи во жолта нијанса, со ѕидови облепени со разни тапети и плафони со гласни флуоресцентни ламби.[3][4] За ова место е карактеристично и појавувањето на непријателски настроени суштества. Легендата вели дека е речиси невозможно да се излезе од Бекрумс;[6] врз основа на ова, интернет-корисниците го прошириле концептот, измислувајќи нови „нивоа“ на лавиринтот со свој уникатен изглед и приказна.[3]

Се смета дека нивоата на Бекрумс ги отсликуваат и ги користат егзистенцијалните и детските стравови, кои често се заборавени или незабележани.[7] Тие ја разоткриваат „темната и застрашувачка страна на светот создаден од човекот, каде што на магацините и канцелариите не им се придава значење, иако постојано ги опкружуваат луѓето“:[3]

<...> На пример, можеби некогаш во ноќта некој од родителите работел доцна во канцеларијата и нѐ оставил сами на себе во голема, празна зграда полна со извиткани ходници што личат на лавиринт. Можеби сме „заглавиле“ во училиште до доцна и сме талкале по празните ходници на место што вообичаено врие од живот.

Изворен текст (англ.)

For instance, maybe a parent was working late at the office one night and left us to our own devices in a big, empty building full of winding, maze-like corridors. Maybe we got stuck after school for one reason or another and wandered the empty halls of a place that was usually bustling with activity.

Историја

[уреди | уреди извор]

Идејата за Бекрумс настанала во една од тематските нишки на анонимниот имиџборд 4chan, објавена на 12 мај 2019 г., во која анонимен корисник побарал од другите „да објават вознемирувачки слики што едноставно изгледаат 'погрешно'“.[5][8][9][10] Првата фотографија што ги прикажува Бекрумс била претходно прикачена во нишка од 22 април 2018 г., исто така посветена на „проклети слики“.[9][11]

Друг анонимен корисник ја коментирал фотографијата споделувајќи го својот концепт за Бекрумс, наведувајќи дека човек паѓа во ова место кога ќе „испадне од реалноста“ (англ. noclip), што првично е поим поврзан со видеоигрите, означувајќи појава кога играчот поминува низ „физичкиот“ простор на играта (границите на картата) што вообичаено треба да му го попречи патот.[9][11][12]

Потоа, еден од учесниците во нишката составил краток опис за ова измислено место:[2][13]

Ако не сте доволно внимателни и испаднете од реалноста на погрешно место, ќе завршите во Бекрумс, каде што нема ништо освен мирисот на стар влажен тепих, лудилото на едноличните жолти тапети, непрекинатиот зуечки звук на флуоресцентните ламби и приближно 1,5 милијарди км² случајно споени празни простории во кои можете да останете заробени.
И Господ нека ви е на помош ако слушнете како нешто талка во близина, бидејќи тоа значи дека тоа веќе ве слушнало вас.

Изворен текст (англ.)

If you're not careful and you noclip out of reality in the wrong areas, you'll end up in the Backrooms, where it's nothing but the stink of old moist carpet, the madness of mono-yellow, the endless background noise of fluorescent lights at maximum hum-buzz, and approximately six hundred million square miles of randomly segmented empty rooms to be trapped in
God save you if you hear something wandering around nearby, because it sure as hell has heard you.

Набрзо по три дена, на 15 мај 2019 г., непознат корисник ја споил првата слика со описот на Бекрумс и создал нова нишка на 4chan со коментар: „Can anybody redpill me on the Backrooms? Saw this on a previous thread and it’s got me intrigued.“ („Може ли некој да ме просветли за Бекрумс? Ова го видов во претходна нишка и ме заинтригира“). Од оваа нишка започнува наглата популаризација на оваа крипипаста, се создаваат мемови и се водат дискусии за понатамошниот развој на феноменот.[9][10]

По некое време, програмери ентузијасти создале програма што симулира случајно генерирање на меѓусебно поврзани празни простории со вкупна површина од околу 1,5 милијарди км², што послужило како основа за развој на многубројни инди-игри и други проекти посветени на Бекрумс.[14]

Откако оваа објава на 4chan станала широко позната, неколку интернет-корисници напишале свои крипипасти поврзани со Бекрумс.[8][10][12] Освен тоа, биле создадени и раширени многубројни мемови на социјалните мрежи, што дополнително го популаризирало концептот.[9] Некои корисници тврделе дека ја виделе таа слика и претходно. Интернет-изданието за приказни на ужасите The Ghost in My Machine наведува дека „Бекрумс“ е „една од најомилените морничави легенди на интернетот“.[9]

Според уредникот на изданието Happy Mag, Менинг Петстон, овие фотографии и описи предизвикуваат чувство на „егзистенцијалност, празнина и ужас“.[11] Споредувајќи ја местоположбата на Бекрумс со дизајнот на нивоа во франшизата Resident Evil, новинарката Кејтлин Кубрик од Somag News ги нарекува Бекрумс „застрашувачка крипипаста на проклети соништа, која им дава ново значење на лавиринтите“.[12] Феноменот исто така бил поврзан со концептот на „кенопсија“ (чувство на непријатност во напуштени места што обично се полни со луѓе), поим воведен во речникот на неологизми The Dictionary of Obscure Sorrows.[14][15]

Местоположбата каде што е направена изворната фотографија долго време била непозната,[8] а постоеле верзии дека станува збор за процедурално генерирана цифрена композиција.[9] Потеклото на фотографијата конечно станало познато во мај 2024 г.; се утврдило дека станува збор за простории на продавницата за мебел HobbyTown во Ошкош, Висконсин. Фотографиите биле направени за време на реконструкција на продавницата во 2003 г. и првично биле објавени на нивната веб-страница. Интернет-корисниците пронашле архивска копија од страницата.[16]

Најмалку две вики-страници служат како складишта за сѐ што е создадено во митологијата на Бекрумс досега: една на платформата Fandom, а друга на Wikidot. Викито на Fandom било прво, но денес не се смета за главно поради слабата модерација и вандализмот. Како поактуелен и „каноничен“ извор на информации денес се признава викито на Wikidot.[9]

Наводи

[уреди | уреди извор]
  1. 1 2 Silvia Trevisson (2022-04-30). „How "backrooms" became an urban legend of the digital age“. nssmag.com (англиски). Архивирано од изворникот 2022-08-04. Посетено на 2022-09-08.
  2. 1 2 „The Backrooms / Part of a series on Creepypasta“. knowyourmeme.com (англиски). Архивирано од изворникот 2022-09-20. Посетено на 2022-09-08.
  3. 1 2 3 4 5 Andrew Lloyd (2022-03-29). „The Backrooms: How a Creepy Office Photo Became an Internet Bogeyman“. Vice.com (англиски). Архивирано од изворникот 2022-11-30. Посетено на 2022-12-11.
  4. 1 2 Reece Rogers (2022-05-11). „How to 'No-Clip' Reality and Arrive in the Backrooms“. Wired (англиски). Архивирано од изворникот 2022-07-10. Посетено на 2022-12-12.
  5. 1 2 „unsettling images“. 4chan.org (archive.4plebs.org) (англиски). 2019-05-12. Архивирано од изворникот на 2022-04-27. Посетено на 2022-12-12. Занемарен непознатиот параметар |subtitle= (help)CS1-одржување: неподобна URL (link)
  6. ↑ Виктор Ра-Страг (2019-08-08). „Не смотри на это…“. Darker (руски). Архивирано од изворникот 2022-12-12. Посетено на 2022-12-12.
  7. ↑ Рената Гиматдинова (2021-09-02). „Что такое лиминальные пространства. Тренд с безлюдными помещениями как из снов захватил соцсети“. Medialeaks (руски). Архивирано од изворникот 2022-12-12. Посетено на 2022-12-12.
  8. 1 2 3 Eve Edwards (2022-05). „Are The Backrooms a real place? This creepy office could be anywhere“. The Focus (англиски). Архивирано од изворникот 2022-12-12. Посетено на 2022-12-12. Проверете ги датумските вредности во: |date= (help)
  9. 1 2 3 4 5 6 7 8 Lucia (2021-07-12). „The Backrooms, Explained: A Guide To The Internet's Favorite Non-Reality“. The Ghost In My Machine (англиски). Посетено на 2026-03-24.
  10. 1 2 3 Thomas Mcnulty (2022-02-11). „Backrooms Minecraft Map Brings Terrifying Internet Meme To Life“. Screen Rant (англиски). Архивирано од изворникот 2022-02-17. Посетено на 2022-12-14.
  11. 1 2 3 Manning Patston (2021-08-03). „The Backrooms: An eerie phenomenon lies behind these familiar hallways“. Happy Mag (англиски). Архивирано од изворникот 2022-02-01. Посетено на 2022-03-03.
  12. 1 2 3 Kaitlyn Kubrick (2020-04-17). „What is The Backrooms? The terrifying creepypasta of cursed dreams“. SOMAG news (англиски). Архивирано од изворникот 2022-02-26. Посетено на 2022-12-13.
  13. ↑ Patston, Manning (2021-08-03). „The Backrooms: an eerie phenomenon lies behind these familiar hallways“. Happy Mag (англиски). Архивирано од изворникот на 2022-02-01. Посетено на 2022-07-16.
  14. 1 2 Mark Frauenfelder (2020-12-13). „The Magnet 0018: The quiet horror of procedural generation“. The Magnet (англиски). Архивирано од изворникот 2022-02-01. Посетено на 2022-12-13. Занемарен непознатиот параметар |subtitle= (help)
  15. ↑ „kenopsia“. The Dictionary of Obscure Sorrows (англиски). 2012. Архивирано од изворникот 2022-02-01. Посетено на 2022-12-13.
  16. ↑ Placido, Dani Di. „Finally, The Internet Found 'The Backrooms'“. Forbes (англиски). Посетено на 2024-05-31.

Надворешни врски

[уреди | уреди извор]
Преземено од „https://mk.wikipedia.org/w/index.php?title=Бекрумс&oldid=5541167“