Андерграунд

Девојки облечени во панк-мода (2011)

Андерграунд (од англ. underground — „подземје“, „подземен“) — претставува збир на творечки правци во современата уметност (музика, книжевност, филм, ликовна уметност и др.) кои ѝ се спротивставуваат на масовната култура, на мејнстрим и на официјалната уметност. Андерграундот опфаќа неформални, независни или од цензура забранети облици и дела на уметноста. Границата меѓу андерграундот и мејнстримот секогаш е нејасна, бидејќи многу уметнички облици и дела што започнале како андерграунд со текот на времето станале популарни и масовно прифатени.

За андерграундот е карактеристично отфрлањето на доминантната идеологија, игнорирањето на стилистичките и јазични ограничувања, и неприфаќањето на општоприфатените вредности, норми и социјални и уметнички традиции — честопати придружено со шокантност на јавноста и бунтовнички дух. Андерграундот ги отфрла, а често и ги крши општествено прифатените политички, морални и етички ориентации и стереотипи на поведение, внесувајќи нови шеми на поведение во секојдневието. Типични теми на американскиот и европскиот андерграунд се: „сексуалната револуција“, дрогата, антирелигиозноста и проблемите на маргинализираните групи.

Современо време

Денес, многу гледишта од андерграундот станале подостапни и комерцијализирани, често губејќи го својот првобитен дух. Нишни музички жанрови, модни стилови и облици на уметност денес широко се пласираат кон публиката од главната струја, што може да ја разреди нивната автентичност.

Покрај тоа, лесниот пристап до културни производи преку интернет уште повеќе ја заматува границата помеѓу андерграундот и главната струја. Како последица на тоа, она што некогаш се сметало за „андерграунд“ сѐ почесто се интегрира во популарната култура, што води кон губење на исклучителноста и заедништвото што првично ги определувале овие движења.

Надворешни врски

• Андерграунд на Ризницата ^?