Алија Авдовиќ

Од Википедија — слободната енциклопедија
Прејди на прегледникот Прејди на пребарувањето

Алија Авдовиќ (Сингелиќ, 1912 - Бањица, 1941) бил македонски првоборец и комунистички деец.[1]

Биографија[уреди | уреди извор]

Основно училиште завршил во родното село, а медреса учел во Скопје. Таму се приклучил кон прогресивното младинско движење. Бил студент при Филозофскиот факултет во Скопје, а како припадник на прогресивното студентско движење бил прогонуван од страна на српската полиција.[2]

Во една партиска провала кон крајот на 1934 година бил уапсен, а потоа и осуден како комунист според Законот за заштита на државата. Казната ја издржувал во затворот во Сремска Митровица, каде стекнал богато револуционерно искуство. По излегување од затворот, поради нарушеното здравје извесно време престојувал во болница и во санаториум, но продолжил со комунистичката дејност во родното село и околината. Во Сингелиќ формирал група активисти (1939) ангажирани во „Селската самопомош“ и во Народната помош за учесниците во работничките штрајкови во Скопје.[3]

По фашистичката окупација, поради антифашистичката дејност повторно бил уапсен на 6 август 1941 година. Бил спроведен во логорот Бањица и со група затвореници стрелан од страна на Гестапо. Пред стрелањето спасил неколку затвореници, со тоа што издејствувал да бидат вратени од стрелиштето. На прашањето од гестаповците за издвојување на комунистите, рекол: „Овде нема други комунисти освен Боро Тодоровиќ и мене“.[4]

Денес, во чест на неговото дело, основното училиште во с. Батинци и една скопска улица во населбата Гази Баба го носат неговото име.

Наводи[уреди | уреди извор]

  1. Македонска енциклопедија (прв том), МАНУ, Скопје, 2009, стр. 30
  2. Тихо Милошевски, „Беа, загинаа, останаа“, Скопје, 1969, стр. 22-23
  3. „Сеќавања од НОБ“, Архив на Скопје, 1975, стр. 10
  4. Крсто Здравковски, „Да не се заборави“, Скопје, 1982, стр. 65-66

Литература[уреди | уреди извор]

  • Alija Avdović-Aljo, "Bolnije od smrti", Kulturni centar Bošnjaka u Republici Makedoniji, 2003.