Национални паркови во Нов Зеланд

Од Википедија — слободната енциклопедија
Прејди на: содржини, барај
Националните паркови во Нов Зеланд (обележани со зелено)

Нов Зеланд има четиринаесет национални паркови под управа на Службата за заштита на природата на Нов Зеланд (англиски: Department of Conservation)[1]

По Законот за национални паркови од 1980 г., национални паркови и резервати се создаваат во области каде пределите и пејзажите се од карактеристичен квалитет, или пак природните карактеристики или еколошките системи се од таква научна важност, што се смета дека нивното запазување е од национален интерес. Законот и овозможува на јавноста слобода на влез и пристап во парковите, но со услови и ограничувања кои се неопходни за зачувувањето на автохтоните растенија и животни, или воопшто за благосостојбата на паркот. Постојат и особено заштитени подрачја (550 км²) во кои може да се влезе само со писмена дозвола.

Законот налага националните паркови да се одржуваат во што поприродна состојба, со што би се одржала нивната вредност како почва, вода и шуми. Автохтоните растенија и животни се заштитени, додека донесените растенија и животни се отстрануваат доколку нивното присуство ги пореметува пропишаните цели. Градежништвото во дивите предели е ограничено на планинарски патеки и колиби кои се од суштинска важност за контролирање на дивите животни и вршење на научни истражувања. Законот ѝ дозволува на Службата за заштита на природата да гради планинарски домови, колиби, кампови, жичарници и слични објекти, како и паркинзи, патишта и патеки. Сместувањето, транспортот и други услужни дејности на влезните места во парковите го овозможува службата, други владини установи, доброволни организации и приватни фирми. Некои услуги во парковите, како обиколки со водич и обука по скијање, ги овозможуваат приватни фирми со концесии од службата.

Список на национални паркови[уреди]

Од север кон југ, националните паркови во Нов Зеланд се следниве:

Национален парк Тонгариро  
(796 км², основан 1887) Првиот национален парк во Нов Зеланд. Има три активни вулкани, Руапеху, Нгаурухое и Тонгариро.
Национален парк Те Уревера  
(2127 км², основан 1954) Заедно со соседниот шумски парк Фиринаки, Те Уревера е најголемиот сочуван предел со автохтони шуми на Северниот Остров. Езерото Ваикаремоана во паркот е познато по неговото живописно крајбрежје.
Национален парк Егмонт  
(335 км², основан 1900) Го опфаќа целото земјиште во радиус од околу девет километри, од планината Таранаки/Егмонт и некои погранични предели на север. Симетричниот конус на заспаниот вулкан е провинцијално обележје.
Национален парк Фангануи  
(742 км², основан 1986) Се граничи со реката Фангануи. Сочинет е од крунска земја, поранешна државна шума и разни поранешни резервати. Самата река не претставува дел од паркот.
Национален парк Кахуранги  
(4,520 км², основан 1996) Се наоѓа северозападиот дел од Јужниот Остров. Полн со спектакуларни и изолирани предели. Има прастари релјефни форми и уникатна флора и фауна. Овој национален парк е втор по големина во земјата.
Национален парк Абел Тасман  
(225 км², основан 1942) Има многубројни приливни мореузи и плажи со златен песок долж крајбрежјето на Тасмановиот Залив. Ова е најмалиот национален парк во Нов Зеланд.
Национален парк Нелсонски Езера  
(1.018 км², основан 1956) Дива и нерамна планинска област во регионот Нелсон. Се протега на југ од пошумените брегови на езерата Ротоити и Роторуа па сè до Национален резерват Луисов Премин.
Национален парк Папароа  
(306 км², основан 1987) На Западниот Брег на Јужниот Остров помеѓу Вестпорт и Грејмаут. Во паркот се наоѓаат прочуените „Карпи-Палачинки“ (Pancake Rocks) кај Пунакаики.
Национален парк Артуров Премин  
(1,144 км², основан 1929) Дива планинска област која се протега напреку главната делница на Јужните Алпи.
Национален парк Вестленд Таи Поутини 
(1,175 км², основан 1960) Се протега од највисоките врвови на Јужните Алпи до диво изолирано крајбрежје. Во паркот има глечери, живописни езера и густа дождовна шума, како и остатоци од рударски населби долж крајбрежјето.
Национален парк Аораки/Кукова Планина 
(707 км², основан 1953) Алпски парк, со највисоката планина во земјата: Кукова Планина (3.754 м) и најдолгиот глечер, Тасмановиот Глечер (29 км). Областа е мошне популарна за планинарство, скијање и туристичко надлетување. Овој парк има предели со извонредна природна убавина. Овој нацинален парк, заедно со националниот парк Вестланд се прогласени за светско наследство.
Национален парк Маунт Аспајринг  
(3.555 км², основан 1964) Комплекс од импресивно глацијализирани планиниски пејзажи распределени околу планината Маунт Аспајринг/Тититеа (3.036 м).
Национален парк Фјордленд  
(12.519 км², основан 1952) Најголемиот национален парк во Нов Зеланд и еден од најголемите во светот. Со неговите величествени пејзажи со длабоките фјордови, глечерски езера, планини и водопади, паркот се стекнал со светска слава како светско природно наследство.
Национален парк Ракиура  
(1.500 км², основан 2002) На Стјуартовиот Остров/Ракиура.

Поврзано[уреди]

Наводи[уреди]

Надворешни врски[уреди]