Либерално-демократска партија (Македонија)

Од Википедија — слободната енциклопедија
Прејди на: содржини, барај
Логото на партијата

Либерално демократската партија е партија со либерална ориентација. Таа е правен наследник на Демократската и Либералната партија, кои на 19 април 1997 се обединија, формирајќи ја ЛДП. За прв претседател на ЛДП е избран Петар Гошев, дотогашниот претседател на Демократската партија. ЛДП е полноправна членка на Либералната Интернационала. Моментален лидер на партијата е Андреј Жерновски.

Историја[уреди]

На парламентарните избори 1998 година ЛДП настапи во коалиција со Демократската партија на Македонија (ДПМ) од Тетово. На овие избори ЛДП освои 79.000 гласови (4 пратенички мандати). За пратеници беа избрани: Петар Гошев, Стојан Андов, Латиф Пајковски и Слободан Даневски. На Првиот конгрес на ЛДП во пролетта 1999, а по неуспехот на парламентарните избори 1998, Петар Гошев се повлече од претседателската функција. За нов претседател е избран Ристо Пенов, дотогашен потпретседател на партијата.

Во 1999 во текот на Kосовската војна, ЛДП влезе во Владата на Република Македонија. За член на Владата, како министер без ресор, беше избран Радован Стојкоски. Како помошник министер за развој беше избрана Лилјана Поповска. По завршувањето на Kосовската војна, ЛДП се повлече од Владата.

На претседателските избори во 1999 година ЛДП учествуваше со свој кандидат, Стојан Андов. Тој на овие избори освои 112.000 гласови и не успеа да се пласира во вториот круг.

На почетокот на 2000 дел од припадниците на поранешната Либерална партија на чело со Стојан Андов (и со пратениците Пајковски и Даневски) ја напушти ЛДП и ја формира Либералната партија на Македонија. Истата година, на Локалните избори 2000 година ЛДП настапи како дел од коалицијата За Македонија заедно, во која членуваа и СДСМ, СПМ и Лигата за демократија.

Во коалиција со СДСМ, ЛДП учествуваше на парламентарните избори 2002 година, освојувајќи 13 пратенички места и влегувајќи во новата влада со 4 министри.

Во 2005 година ЛДП доживеа уште едно отцепување. Лилјана Поповска ја напушти партијата и формира своја партија, Демократска обнова на Македонија.

На парламентарните избори во 2006 година, ЛДП повторно настапи во коалиција со СДСМ и освои 5 пратенички мандати. Претседателот на партијата, Ристо Пенов, најави повлекување од лидерската позиција, по што, на 11 февруари 2007 година за нов претседател на Партијата е избран Јован Манасијевски.

Во 2009, партијата за прв пат настапува самостојно на локалните и претседателските избори каде што го кандидира порашниот амбасадор при НАТО, проф. д-р Нано Ружин.

Парламентарни избори 2011[уреди]

На Парламентарните избори на 5 јуни 2011 година партијата добила вкупно 16.551 гласови. Поради лошиот изборен резултат и неосвојувањето на ниедно пратеничко место, претседателот Манасијевски на 6 јуни 2011 поднел неотповиклива оставка.[1] На негово место е избран Андреј Жерновски.[2]

Наводи[уреди]

  1. „Лидерот на ЛДП денеска поднесе оставка.“ (на македонски). А1. 06 јуни 2011. http://www.a1.com.mk/vesti/default.aspx?VestID=139034. конс. 10 јуни 2011. 
  2. Андреј Жерновски избран за лидер на ЛДП“, Дневник (дневен весник), 2 октомври 2011 (конс. 3 октомври 2011).

Надворешни врски[уреди]