Индијана Џонс и кралството на кристалниот череп

„Индијана Џонс и кралството на кристалниот череп (Indiana Jones: Kingdom of the Crystal Skull)“
Режисер	Стивен Спилберг
Продуцент	Франк Маршал, Денис.Л. Стјуарт Џорџ Лукас, Кетлин Кенеди
Сценарист	Приказна: Џорџ Лукас, Џеф Натансон Сценарио: Дејвид Коеп
Главни улоги	Харисон Форд Кејт Бланшет Карен Ален Реј Винстон Џон Херт
Жанр	авантура
Дистрибутер	Paramount Pictures
Премиера	22 мај 2008
Времетраење	124 мин.
Земја	САД
Јазик	англиски
Буџет	185 000 000 долари
Бруто заработка	641 877 155 долари
Претходен	Индијана Џонс: Последната крстоносна војна
Следен	Индијана Џонс и артефактот на судбината

„Индијана Џонс и кралството на кристалниот череп“ (англиски: Indiana Jones: Kingdom of the Crystal Skull) — американски авантуристички филм на Стивен Спилберг од 2008 година. Во главната улога се појавува Харисон Форд во улога на археологот и авантуристот Индијана Џонс, а покрај него, во филмот настапуваат и: Кејт Бланшет, Шија Лебаф, Џим Бродбент, Карен Ален и Џон Харт. Продуцент на филмот е Џорџ Лукас. Дејството на четвртиот дел по ред филм од триологијата Индијана Џонс е сместено во 1957 година. Премиерата на филмот во САД како и во Македонија била на 22 мај 2008 година.

Содржина

Приказната започнува во пустината Саутвест во 1957 година, во време на Студената војна. Инди (Индијана Џонс) и неговиот помошник Мак едвај ја избегнале блиската средба со советскиот агент. Имено, советските агенти забележале дека на професорот Индијана Џонс едно момче му носи шифрирана порака од стариот колега, професорот Харолд Оксли. Потоа, професорот Џонс се враќа дома, на Маршал Колеџот каде работите одат превртено – неговите неодамни активности го направиле посомнителен, па владата врши притисок врз Маршал Колеџот да го отпушти. На својот пат од градот, Индијана го сретнува младиот бунтовник Мут, кој има интересен предлог за авантурата. Мут е млад бунтовнк, момче кое немало нормално детство, го напуштил училиштето и станал опседнат од мотори. Ако му помогнел во сопствената мисија, би можел да наиде на едно од најспектакуларните археолошки откритија и во минатото – кристалниот череп Акатора, легендарниот објект на фасцинација, празноверие и страв.

Но, патот кон најоддалечениот крај Перу – земјата на древните гробови, заборавените истражувачи и златниот град откриваат дека во својата потрага не се сами. Советските агенти исто така се во жешка потрага по кристалниот череп. Главна меѓу нив е убавата Ирина Спалко (Кејт Бланшет), која го бара кристалниот череп околу светот, верувајќи дека тој може да им помогне на Советите да завладеат со светот. Инди и Мут го пронаоѓаат черепот, но мора да ги избегнат Советите, да се борат со непријателите и да спречат моќниот кристален череп да падне во најопасните раце.

Улоги

Глумци	Ликови
Харисон Форд	Индијана Џонс
Кејт Бланшет	Ирина Спалко
Карен Ален	Мерион Рејвенвуд
Реј Винстон	Џорџ МекХејл
Џон Херт	Харолд Оксли
Џим Бродбент	Дин Чарлс Стенфорд

Прифаќање од критичарите

Според мрежното место Rotten Tomatoes, 79% од критиките на филмот се позитивни, а публиката му доделила нешто помал процент – 66%. Иако многу критичари имаат замерка околу приказната (за која велат дека е неиновативна), за главниот лик и за филмот во целост (San Francisco Chronicle и списанието Rolling Stone го нарекуваат најлошото продолжение досега), сите тие на крајот велат дека го одгледале филмот во еден здив и дека им нуди одговорна доза акција, хумор и романса. И тоа е она што ги привлекува гледачите на овој филм.