Жед (филм)

„Ж е д“
Режисер	Димитрие Османли
Сценарист	Живко Чинго
Главни улоги	Ацо Јовановски Дарко Дамески Павле Вуисиќ Петре Прличко Драги Костовски Коле Ангеловски
Жанр	социјален
Музика	Трајко Прокопиев
Дистрибутер	Филмско студио Скопје
Премиера	1971
Времетраење	84 мин.
Земја	СР Македонија
Јазик	македонски

„Жед“ e македонски игран филм од 1971 година, снимен по сценарио на Живко Чинго, а во режија на Димитрие Османли. Главните улоги ги толкуваат: Дарко Дамески, Ацо Јовановски, Драги Костовски и Јадвига Митревска. Монтажер е Миланка Нановиќ, а музиката ја компонирал Трајко Прокопиев. Филмот трае 84 минути, а снимен е во колор-техника, со 35. милиметарска камера.

Кратка содржина

Жителите на едно село во пасивен македонски крај својата егзистенција ја обезбедуваат испраќајќи ги мажите на печалба. Во селото работат и живеат три учителки, младите девојки Елица, Марија и Николина, и секоја на свој начин се обидува да му даде смисла на животот кој им е наметнат во оваа средина. Најголем проблем во селото е снабдувањето со вода. Од далечниот планински извор водата ја носи водоносецот Марко, кој е вљубен во сиромашната девојка Кате. Нивната врска нема перспектива поради исклучителната сиромаштија во која живеат. Монотонијата на селскиот живот се разбива со доаѓањето на групата рударски инженери кои во планината вршат истражувања. Меѓу нив е и инженерот Виктор, кој го привлекува вниманието на учителката Марија. Таа е во дилема дали да ја прифати можноста да замине со него од селото и коренито да го измени својот живот. Сепак, пресудна е нејзината желба да им се помогне на децата и жителите од селото и таа останува. Враќањето на остарениот печалбар Трендафил, вујко на Кате, претставува своевиден настан за животот на селото. Судбината на многумина во селото зависи од „богатството“ на вујкото кој се врати од Америка. Внуката Кате се надева дека ќе и биде овозможено да се оствари нејзината љубов кон водоносецот Марко и желбата да има свое семејство. Интерес покажува и учителката Елица, сметајќи дека парите од стариот печалбар ќе значат излез за бегство од селото. Но, место за надеж нема, бидејќи Трендафил се враќа од Америка без печалба. Надежите на многумина се изневерени. Кате останува сама, бидејќи Трендафил заминува на печалба; Елица се соочува со уште едно разочарување, а стариот печалбар умира осамен и презрен од сите.

Надворешни врски

• Zedj на Семрежната филмска база на податоци (англиски)
• Кинотека на Македонија