Градиште (Подвис)

Градиште — археолошко наоѓалиште во кичевското село Подвис. Претставува населба од доцноантичко време. Се наоѓа на 1 км западно од селото, каде има голема височинка со стрмни страни, што се наоѓа источно од суводолицата Плевење и северно од патот Кичево-Охрид. Врвот ѝ е зарамнет, со површина од 50 × 25 м, опкружен со бедем чии темели можат прилично добро да се насетат. Според кажувањето на мештаните, до скоро време бедемот бил видлив на повеќе места. Денес во просторот на градиштето има множество фрагменти од питоси, покривни ќерамиди, купишта кршен камен и друг градежен материјал. На источната страна, во подножјето, во приватни ниви се најдени два примерока од архитектонска декоративна пластика, поточно, капител и квадратен блок од мермер. Капителот е во облик на пресечена пирамида на која трите страни ѝ се украсени со орнамент во облик на лушпи од риба, додека на четвртата (челната) има четвртесто поле во кое се врежани буквите КОЅ — изведени во римска капитела. Што се однесува до блокот, на горната страна има врежано каналче за поврзување со олово, според што може да се претпостави дека имал функција на некаков постамент, можеби база на столб. По површината на нивите има доста фрагменти од тегули. Наодите се чуваат во Музејот во Кичево.

Поврзано

• Подвис;
• Список на археолошки наоѓалишта во Кичевско;

Надворешни врски

• Градиште во Средновековни градови и тврдини во Македонија на Иван Микулчиќ