Владимир Бојаџиев
| Владимир Бојаџиев | ||
| Роден | 30 септември 1869 Охрид, Македонија | |
|---|---|---|
| Починал | 3 август 1956 Софија, Бугарија | |
Владимир Бојаџиев — македонски револуционер, учесник во македонското револуционерно движење и член на Македонската револуционерна организација. Во предвечерјето на Илинденско востание бил назначен за директор на охридските училишта и избран за раководител на револуционерниот комитет.[1]
Животопис[уреди | уреди извор]
Бојаџиев е роден 1869 година во Охрид, тогаш во Отоманското Царство. Во 1893 година завршил историја при Вишото училиште во Софија, а потоа работел како учител во Скопје, Сер, Одрин и други места. Бил класен наставник на Тодор Александров. Влегува во Македонската револуционерна организација и од 1897 до 1898 година е член на окружниот комитет во Одрин, а подоцна е член на околискиот револуционерен комитет во Воден и Охрид. Во предвечерјето на Илинденско востание бил назначен за директор на охридските училишта и избран за раководител на револуционерниот комитет. Во март 1905 година е фатен и осуден на 4 години затвор. Во 1908 година е пуштен од Битолскиот затвор заради колективната амнистија после Младотурската револуција. Бил Охридски делегат на основањето на Бугарските уставни клубови во Битола. Во периодот од 1908 до 1912 година предава во Битолската класична гимназија. Од 1912 година станува директор на гимназијата во Костенец (2 години), потоа учител во Машката гимназија во Плевен (14 години), а истовремено и окружен школски инспектор. Потоа станува директор на гимназијата во Долни Дабник (Плевенски округ). Од 1931 година живее во Софија. Добитник е на орденот "За гражданска заслуга" .[2].
Извори[уреди | уреди извор]
- ↑ Алманах на българските национални движения след 1878 г., Академично издателство "Марин Дринов", София: 2005 г., стр. 268-269
- ↑ Николов, Борис. Й. Вътрешна македоно-одринска революционна организация. Войводи и ръководители (1893-1934). Биографично-библиографски справочник, София, 2001, стр. 22.