Македонски Бугари (бугарски: македонски българи) — етничка заедница што живее во Македонија. Во државата има многу мал број граѓани што се декларираат како Бугари и истите често се нарекуваат бугарофили, кои заедно како една целина не се признато етничко малцинство. Најголем број Бугари се сконцентрирани во регионот на Струмица,[2] можеби поради тоа што градот територијално се наоѓа во близина на Бугарија и бил двапати дел од бугарската држава (1912 — 1919 и 1941 — 1944).[3] Во периодот помеѓу 1945 — 1991 година додека Македонија била дел од Југославија имало миграција на бугарското население од Босилеградско во Република Македонија, а најголемиот дел од него се населил во Скопје.[4] На последниот попис во Македонија во 2021 година како Бугари се изјасниле 3.504 граѓани, кои претставуваат околу 0,2 % од целото население.
Во текот на неуспешниот „Попис 2011“ во Македонија Бугарскиот културен клуб започнал кампања која гласела: Сите биле Бугари. А ти?[5][6] која во текот на своето видео ги прикажува славните историски личности Св. Климент Охридски, Цар Самоил, Гоце Делчев како Бугари. Во Македонија има бугарско здружение Радко и Здружение на граѓани „Цар Борис III“[7] во Охрид и Бугарски културен клуб[8] во Скопје. Според официјалните подотоци на КБГБЧ од 2002 до крајот на 2020 година речиси 90.000 македонски граѓани земале бугарски пасоши со кои може да патува и работи во земјите од ЕУ без визи.[9] Уште околу 60.000 лица поднеле молби за бугарско државјанство за кое мора да потпишат документ дека имаат бугарско потекло. Прашање е колку од тие што добиле пасош или поднеле молби се чувствуваат Бугари, а колку на таков чекор се решиле од економски причини. На парламентарните избори во Бугарија 2021, бројот на пријавени гласачи во бугарската амбасада во Скопје изнесувал само 328 лица, а со тоа е јасен фактот дека тие пасоши се вадени поради економска причина.[10][11][12][13]
