Егејска Македонија

Приморска Македонија во рамките на етничка Македонија

Егејска Македонија (уште и Приморска или Беломорска Македонија) е дел од етничка Македонија, а денес е во состав на Република Грција. Претставува најголем регион во денешна Република Грција според површина и втор регион според број на население. Грците овој дел го нарекуваат едноставно Македонија (грчки: Μακεδονία), бидејќи сметаат дека тоа е единствениот ентитет кој има право да го носи името Македонија . Ова е една од причините за грчко-македонскиот спор околу името на Република Македонија.

Егејска Македонија зафаќа околу 34.356 km² или околу 51% од територијата на географско-историската целост Македонија. На запад се граничи со Албанија преку планините Грамос и Горбеч, на југ и југозапад оградена од планините Пинд и Олимп се граничи со грчката област Тесалија, на југоисток излегува на Егејското море, на исток преку реката Места се граничи со областа Тракија, а на север се граничи со Република Македонија (Вардарска Македонија) и Бугарија (Пиринска Македонија).

Административна поделба

Административна поделба на Егејска Македонија во рамките на Грција

Според актуелната административна поделба на Република Грција, Егејска Македонија не претставува една административна единица, туку е поделена на три покраини, кои се нарекуваат: Западна Македонија, Централна Македонија и Источна Македонија и Тракија. Најголем град во Егејска Македонија е Солун. Тој е седиште на покраината Централна Македонија.

Периферија Западна Македонија

Види Западна Македонија (периферија)

Покраината е позната по планините: Неред со врвот Вич (2.128 m), Сува Гора, Горбеч, Пинд, Грамос, северните падини на Олимп јужните падини на Ниџе, Негушката Планина и Каракамен. Во овој дел се наоѓа и најјужниот дел на Пелагонија односно Леринското Поле. Карактеристични за овој регион се многуте езера како Островското, Петерското, Костурското, Рудничкото и Малото Преспанско Езеро.

Административна поделба на префектури:

1. Префектура Костур
2. Префектура Лерин
3. Префектура Кожани
4. Префектура Гревена

Периферија Централна Македонија

Види исто така Централна Македонија (периферија)

Територијата на Централна Македонија се состои во 84% од огромното плодно Солунско Поле. Во овој дел се вбројуваат и Пајак Планина, Мегленската котлина и Циганската клисура. Низ овој дел Вардар го завршува својот тек и се влева во Егејското Море кај Солун.

Административна поделба на префектури:

1. Префектура Иматија
2. Префектура Кукуш
3. Префектура Постол
4. Префектура Пиерија
5. Префектура Сер
6. Префектура Солун
7. Префектура Халкидики

Периферија Источна Македонија и Тракија

Види исто така Источна Македонија и Тракија

Источниот дел на Егејска Македонија може да се карактеризира со две големи реки: Струма и Места, како и релативно ниски планини и ридести предели како Круша, Карадаг и други. Од околиите на оваа покраина, само две се во Егејска Македонија:

Административна поделба на префектури:

1. Префектура Драма
2. Префектура Кавала

Овие се под надлежност на државното владино Министерство на Македонија и Тракија.

Периферијата се граничи со соседните периферии Тесалија и Епир.

Градови и број на нивното население во Егејска Македонија

Листа на градови во Егејска Македонија според бројот на нивното население
1. Солун	773.180
2. Кавала	58.663
3. Сер	54.266
4. Катерини	50.510
5. Бер	42.794
6. Драма	42.501
7. Кожани	38.591
8. Кајлар	30.017
9. Јениџе Вардар	26.296
10. Негуш	19.870
11. Воден	18.253
12. Кукуш	17.430
13. Костур	14.813
14. Лерин	14.279
15. Дедеагач	13.229

Историја на Егејска Македонија

На територијата на Егејска Македонија, како и на целата територија на Македонија, население имало уште од старото камено време. Доказ за тоа се пронајдоците во пештерата Камено Гумно (Петралона) на Халкидичкиот полуостров. Уште од раните времиња на антиката, Егејска Македонија била дел на Античка Македонија позната како Долна Македонија. На територијата на Егејска Македонија се наоѓале и македонските кралски престолнини Пела и Ајга.

Во периодот на христијанството токму на брегот на Егејското Море во Егејска Македонија била покрстена првата Македонка Лидија, а низ Егејска Македонија пропатувал и апостол Павле каде што ги образувал првите христијански црковни општини во Македонија и Европа воопшто. Во периодот на доаѓањето на Словените, солунските браќа Кирил и Методиј ќе ја создадат словенската азбука глаголица врз основа на македонските словенски говори од Солунско. Во средновековниот период територијата на Егејска Македонија, покрај под византиска власт, ќе влезе и во составот на државите на неколку балкански феудалци се до потпаѓањето под турската власт.

Во турскиот период на владеење на територијата на Егејска Македонија ќе се случи најпрвин Негушкото востание во 1828 година, а свој силен одглас ќе има Илинденското востание особено во западните краишта.

По Балканските војни, според Букурешкиот мировен договор од 1913 година, територијата на Егејска Македонија и се доделува на Грција и од тогаш започнува најтешкиот момент во историјата за македонското население на овие простори. Со бескрупулозни и насилни методи во периодот 1913 - 1922 година грчките власти ќе спроведат колонизаторска политика врз Македонците со што ќе го сменат етничкиот карактер на целата област. За време на Граѓанската војна во Грција (1945-1949) дури 14.000 Македонци ќе застанат да се борат во редовите на ДАГ, но тоа ќе се одрази уште покатастрофално врз Македонците со нов бран на насилни протерувања, ѕверски убиства и мачења од страна на грчките монархо-фашистички власти.

Етнички состав на населението

Година	Население	Македонци православни	Македонци муслимани	Турци	Грци	Евреи	Власи	Роми	Албанци	Други
1904		896.494
1912		326.426	41.000	295.000	234.000	60.000	50.000	30.000	9.000
1913		329.371		314.354	236.775	68.206	44.414	25.302	15.108	8.019
1921		500.000			21,1%
1942		195.395 (72.2%)			21,1%

Македонците во Егејска Македонија

Знамето на Република Македонија (1991-95). Националното знаме на Македонците, со ѕвездата од Кутлеш

Егејска Македонија денес има околу 2.200.000 жители. Точниот број на лицата што се декларираат себеси како етнички Македонци не е познат, бидејќи при спроведувањето на пописите, не постои графа за националност со наслов Македонци. Според повеќе изјави на раководителите на македонската партија Виножито (пред се Павле Воскопулос) бројката на Македонците во Грција се движи до 400.000 луѓе. Сепак поради големите рестриктивни и агресивни асимилациони и денационализаторски мерки кои биле преземани врз Македонците од страна на грчките власти во минатото, голем дел од Македонците во Егејска Македонија се со ниска национална свест, а македонскиот јазик е минимизиран пред се кај младите Македонци. Најголем број на Македонци живеат во западните и северозападните делови на Егејска Македонија во градовите Лерин, Воден, Костур и нивните околни села. Генерално кажано, грчката влада не признава постоење на македонско малцинство во Грција и поради ова често пати е цел на критики од страна на повеќе странски организации меѓу кои и Хелсиншкиот Комитет.

Во Егејска Македонија не постои образование на македонски јазик, а обидите да се создаде Македонски Културен Центар во Воден, биле спречени од страна на грчката администрација. Во 2006 година во Атина и Солун беше промовирано повторното издание Абецедарот на современата македонска азбука и јазик, кој за прв пат бил испечатен во 1925 година од страна на грчката влада, што е чекор напред во подобрувањето на малцинските права на Македонците во Егејска Македонија и Грција воопшто. Во најново време во јули 2007 македонскиот национален фолклорен ансамбл „Танец“ одржа турнеја низ повеќе места во Егејска Македонија како што се Кајљарско, Мегленско и Леринско, на големо воодушевување и задоволство на тамошните жители Македонци. Оваа турнеја своевидно претставува и прв културен контакт на Македонците од Република Македонија со своите сонародници Македонци кои суште живеат во Егејска Македонија, по подолго време од над 50 години.

Општиот став кој владее во Грција е дека тврдењето за постоење на македонско малцинство претставува територијална претензија на Република Македонија.

Партии и организации на Македонците во Егејска Македонија

Македонците во Егејска Македонија се организирани во партијата Виножито со седиште во Лерин, и покрај острите репресии од страна на грчките власти. Партијата на Македонците во Егејска Македонија активно се бори за малцинските права на Македонците во Грција преку разни протести во Европскиот парламент и до европските институции и во внатрешниот политички живот на Грција.

Познати Македонци од Егејска Македонија

Види исто така: Категорија:Родени во Егејска Македонија

• Александар Македонски - роден во Пела (Постол) во 356 година п.н.е., најпознатиот античко-македонски крал кој го проширил македонското кралство до Индија и Египет.
• Крсте Петков Мисирков - роден во с.Постол (Пела) Воденско во 1885 година, најголем македонски национален идеолог, борец за македонската национална самобитност и основоположник на македонскиот литературен јазик.
• Гоце Делчев - роден во Кукуш во 1872 година, најголем македонски револуционер и идеолог на македонското национално-ослободително револуционерно движење.
• Димитар Влахов - роден во Кукуш во 1878 година, познат македонски национален деец, политичар и државник, еден од основачите на ВМРО (Обединета).
• митрополит Теодосиј Гологанов - роден во Трлис, Серско, македонски национален деец и голем поборник за обновување на Охридската архиепископија и за создавање на македонска национална држава.
• Лазо Ангеловски - роден во село Граждено, на 10 август 1925 година. На 19 август 1948 година е стрелан во Лерин од тогашните грчки власти.

Поврзано

• Македонија
• Вардарска Македонија
• Пиринска Македонија
• Регион Македонија

Надворешни врски

• Егејска Македонија - Веб-страница на македонски јазик за Егејска Македонија
• Виножито - Официјална веб-страница на партијата на Македонците во Грција
• Стојан Киселиновски „Егејскиот дел на Македонија (1913-1989)“
• Утрински весник - Запис за конгресот на Виножито во Солун
• Список на некои оригинални македонски топоними
• Македонските називи за населените места во Егејска Македонија - Google Maps